Шимолий Кореянинг АҚШ ёки унинг иттифоқчиларига ядровий зарба беришга уриниши Ким Чен Ин режимининг интиҳоси бўлади. Бу ҳақда АҚШ президенти Жо Байден Оқ уйда Жанубий Корея етакчиси Юн Сук Ёл билан бўлиб ўтган матбуот анжуманида гапирди, деб ёзмоқда Bloomberg.
“Бундай (ядровий) ҳужум номақбул бўлади ва ушбу ҳаракатларга қўл урадиган ҳар қандай режимнинг тугашига олиб келади”, — деди Байден.
Унинг таъкидлашича, АҚШ Жанубий Корея билан биргаликда КХДР қўлида ядро қуроли тўпланишига қарши курашишнинг янги усулларини ишлаб чиқмоқда. Сўнгги ўн йил ичида биринчи марта АҚШнинг атом сувости кемалари Жанубий Корея ҳудудида жойлаштирилиши мумкин.
“Биз яриморолга ядро қуролини жойлаштирмоқчи эмасмиз, лекин портларни айланиб чиқамиз, ядровий сувости кемаларини юборамиз ва ҳоказо. Бу масалада ортга чекинмаймиз”, — деди Байден.
Икки давлат раҳбарлари, шунингдек, мувофиқлаштиришни яхшилаш, стратегик қуроллар соҳасида ҳамкорлик бўйича маълумот алмашиш ва қўшма ҳарбий машғулотларни кўпроқ ўтказиш учун ядровий маслаҳат гуруҳини тузишга келишиб олган.
Эслатиб ўтамиз, 14 апрель куни Шимолий Корея биринчи марта “Хвасон-18” қитъалараро баллистик ракетасини учирган эди. Ким Чен Ин бу синов “мамлакатнинг душман ҳужумига ядровий зарба беришга тайёрлигини ошириши” ва “стратегик тийиб турувчи кучлар таркибини тубдан қайта қуриш” имконини беришини таъкидлаган.
“Хвасон-18” учирилганидан кейин Жанубий Корея, АҚШ ва Япония ҳарбийлари Япон денгизида ракетага қарши мудофаа машғулотларини бошлади.
Изоҳ (0)