Prezident administratsiyasi rahbarining o‘rinbosari Komil Allamjonov, sho‘ba mudiri Saida Mirziyoyeva va maktabgacha va maktab ta’limi vaziri Hilola Umarova UNICEF’ning O‘zbekistondagi vakolatxonasi rahbari Munir Mamadzade va xalqaro tashkilotlar ekspertlari bilan uchrashuv o‘tkazdi.
Uchrashuvda O‘zbekistonda sifatli maktab ta’limidan foydalanish imkoniyatlarini kengaytirish va barcha bolalar, jumladan, ijtimoiy himoyaga muhtoj bolalar uchun teng imkoniyatlarni ta’minlash bo‘yicha UNICEF va UNESCO’ning qo‘shma loyihasi muhokama qilindi.
Xalqaro tashkilotlar ta’lim sohasini rivojlantirish bo‘yicha ilmiy tadqiqotlar olib boradi va mavjud beshta muammoli yo‘nalish bo‘yicha vaziyatni yaxshilash strategiyasini ishlab chiqadi. Jumladan, maktab infratuzilmasini modernizasiya qilish, inklyuziv o‘quv-uslubiy materiallari ishlab chiqish va taqdim etish hamda o‘qituvchilarning malakasini oshirish ko‘zda tutilgan.
“Maktabgacha va maktab ta’limi vazirligi va xalqaro tashkilotlar bilan birgalikda katta tadqiqot o‘tkazildi. Mavjud muammolarga aniq diagnoz qo‘yib, uning yechimi bo‘yicha aniq strategiya va moliyalashtirish manbalari belgilangandi.
Barcha xalqaro tashkilotlar — UNICEF, UNESCO, USAID va Jahon bankiga O‘zbekiston ta’lim tizimiga befarq bo‘lmagani uchun minnatdorlik bildiramiz. Umid qilamanki, biz hamkorlikda albatta, sifatli ta’lim tizimini yaratishga muvaffaq bo‘lamiz”, — deb yozadi Komil Allamjonov.
Izoh (0)