Tatariston Respublikasi rahbari Rustam Minnixanov “Jizzax plastmassa” AJ negizida tashkil etilgan “Jizzax” kimyo-industrial texnoparki ochilish marosimida ishtirok etdi. Bu haqda Jizzax viloyati hokimligi matbuot xizmati xabar berdi.
Ma’lum qilinishicha, ochilish marosimida Rustam Minnixanov, bosh vazir o‘rinbosari Jamshid Xo‘jayev va viloyat hokimi Ergash Soliyev ishtirok etib, so‘zga chiqqan. Shundan so‘ng, mehmonlar Qozon federal universitetining Jizzax shahri filialidagi tibbiy taʼlim markazini ko‘zdan kechirgan.
2023-yilning 20-aprelida O‘zbekiston prezidentining “Jizzax va Toshkent viloyatlarida kimyo-sanoat texnoparklarini tashkil etish chora-tadbirlari to‘g‘risida”gi qarori qabul qilingandi. Unga asosan, “Jizzax plastmassa” AJ hududidan hudud tanlab olingan. 2022-yilning oktabr, noyabr va 2023-yilning mart oylarida “Ximgrad” AJ va Rossiya kompaniyalari vakillari ushbu korxonaga tashrif buyurib, Jizzax viloyatida kimyo-sanoat texnoparkini tashkil etish bo‘yicha tegishli tashkiliy ishlarni amalga oshirgan.
Ta’kidlanishicha, “Jizzax plastmassa” aksiyadorlik jamiyati O‘zbekistondagi polietilen quvurlar, plyonka va keng turdagi xalq isteʼmoli mollari ishlab chiqaradigan yirik korxona hisoblanadi. “Jizzax plastmassa” AJda ishlab chiqarilayotgan barcha mahsulotlar milliy va xalqaro standartlarga mos keladi.
Mehmonlar bu yerda talabalarga yaratilgan shart-sharoitlarni yuqori baholab, “Sambhram” universiteti va Futbol mahorat maktabida bo‘lgan.
Shuningdek, New Land MCHJ tikuvchilik korxonasiga ishchi va xizmatchilar uchun yaratilgan qulayliklar, “Farali” brendi ostida chiqarilayotgan tayyor mahsulotlar namunalari bilan tanishildi va Jizzax shahridagi “Olmazor” mahallasida barpo etilgan ko‘p qavatli turar joylardagi aholiga yaratilgan sharoitlar bo‘yicha Tatariston rahbari Rustam Minnixanov masʼullar bilan suhbat o‘tkazgan.
Tatariston rahbari Rustam Minnixanov 24-aprel kuni ishchi tashrif bilan O‘zbekistonga keldi. Shavkat Mirziyoyev shu kuni Minnixanovni qabul qilgan va tomonlar ustuvor investitsiya loyihalarini amalga oshirish va madaniy-gumanitar almashinuvlarni yanada kengaytirish masalalarini ko‘rib chiqqan.
Izoh (0)