Татаристон Республикаси раҳбари Рустам Минниханов “Жиззах пластмасса” АЖ негизида ташкил этилган “Жиззах” кимё-индустриал технопарки очилиш маросимида иштирок этди. Бу ҳақда Жиззах вилояти ҳокимлиги матбуот хизмати хабар берди.
Маълум қилинишича, очилиш маросимида Рустам Минниханов, бош вазир ўринбосари Жамшид Хўжаев ва вилоят ҳокими Эргаш Солиев иштирок этиб, сўзга чиққан. Шундан сўнг, меҳмонлар Қозон федерал университетининг Жиззах шаҳри филиалидаги тиббий таълим марказини кўздан кечирган.
2023 йилнинг 20 апрелида Ўзбекистон президентининг “Жиззах ва Тошкент вилоятларида кимё-саноат технопаркларини ташкил этиш чора-тадбирлари тўғрисида”ги қарори қабул қилинганди. Унга асосан, “Жиззах пластмасса” АЖ ҳудудидан ҳудуд танлаб олинган. 2022 йилнинг октябрь, ноябрь ва 2023 йилнинг март ойларида “Химград” АЖ ва Россия компаниялари вакиллари ушбу корхонага ташриф буюриб, Жиззах вилоятида кимё-саноат технопаркини ташкил этиш бўйича тегишли ташкилий ишларни амалга оширган.
Таъкидланишича, “Жиззах пластмасса” акциядорлик жамияти Ўзбекистондаги полиэтилен қувурлар, плёнка ва кенг турдаги халқ истеъмоли моллари ишлаб чиқарадиган йирик корхона ҳисобланади. “Жиззах пластмасса” АЖда ишлаб чиқарилаётган барча маҳсулотлар миллий ва халқаро стандартларга мос келади.
Меҳмонлар бу ерда талабаларга яратилган шарт-шароитларни юқори баҳолаб, “Sambhram” университети ва Футбол маҳорат мактабида бўлган.
Шунингдек, New Land МЧЖ тикувчилик корхонасига ишчи ва хизматчилар учун яратилган қулайликлар, “Фарали” бренди остида чиқарилаётган тайёр маҳсулотлар намуналари билан танишилди ва Жиззах шаҳридаги “Олмазор” маҳалласида барпо этилган кўп қаватли турар жойлардаги аҳолига яратилган шароитлар бўйича Татаристон раҳбари Рустам Минниханов масъуллар билан суҳбат ўтказган.
Татаристон раҳбари Рустам Минниханов 24 апрель куни ишчи ташриф билан Ўзбекистонга келди. Шавкат Мирзиёев шу куни Миннихановни қабул қилган ва томонлар устувор инвестиция лойиҳаларини амалга ошириш ва маданий-гуманитар алмашинувларни янада кенгайтириш масалаларини кўриб чиққан.
Изоҳ (0)