АҚШ Давлат котиби Энтони Блинкен 24 апрель куни кечқурун Судандаги урушаётган томонлар маҳаллий вақт билан ярим тунда бошланадиган уч кунлик сулҳга келишиб олганини эълон қилди. Бу ўн кунлик жанглар давомида учинчи марта сулҳ эълон қилиниши, бундан аввал иккитаси барбод бўлган.
Блинкеннинг BBC журналистига айтишича, Судандаги мунатазам армия ва ҳарбийлаштирилган “Тезкор ҳаракат кучлари” билан ўт очишни тўхтатиш келишувига 48 соатлик музокаралардан сўнг эришилган. Reuters агентлигининг тушунтиришича, АҚШ ва Саудия Арабистони музокараларда воситачи бўлган.
“Тезкор ҳаракат кучлари” Блинкеннинг сўзларини ўт очишни тўлиқ тўхтатишга тайёрлиги ҳақидаги баёнот билан тасдиқлади.
Судан мунтазам армияси эса, Блинкен сулҳ бошланганини эълон қилганидан икки соат ўтиб, Facebook орқали сулҳга риоя қилиш ниятида эканини эълон қилди.
Суданда икки ҳарбий тузилма ўртасидаги жанглар 15 апрель куни бошланган, унда камида 400 киши ҳалок бўлган. Жанглар туфайли Судан пойтахти Хартумдаги аҳоли озиқ-овқат ва сувсиз қолди, улар уйдан чиқа олмаяпти. Баъзи жойларда сув таъминоти бузилган, кўплаб хартумликларнинг сув учун Нил дарёсига боришдан бошқа чораси қолмаяпти.
Сулҳга риоя қилинса, тинч аҳолига шаҳарни тарк этиш имкони берилади. Бундан ташқари, хорижий давлатлар ўз фуқароларини Судандан эвакуация қила олишга умид қилмоқда.
Хартум ва Суданда умуман ёки деярли интернет алоқаси йўқ: тармоқ мониторинги гуруҳи NetBlocks маълумотларига кўра, бутун мамлакат бўйича ҳозирда интернетдан фойдаланиш 2 фоизни ташкил этади, Хартумда якшанба оқшомида интернет бутунлай ўчиб қолган.
Изоҳ (0)