Joriy yilning mart oyida respublikada gaz qazib olish hajmi 12,2 foizga, elektr energiyasi ishlab chiqarish 10,6 foizga qisqardi.
O‘zbekistonda gaz qazib olish va elektr energiyasi ishlab chiqarish hajmining qisqarishi joriy yilda uchinchi oy ketma ket davom etmoqda. Bu haqda Statistika agentligi hisobotida maʼlum qilingan.
Respublikada 2023-yil mart oyida 4,1 milliard kub metr tabiiy gaz qazib olindi. Taqqoslash uchun, 2022-yilning martida 4,7 milliard kub metr gaz qazib olingandi. Bu ko‘rsatkich o‘tgan yilning martiga nisbatan 12,2 foizga kam.
Joriy yil choragida gaz qazib olish hajmida o‘tgan yilga qaraganda sezilarli qisqarish kuzatilmoqda. Masalan, 2023-yil yanvar oyida 4,3 milliard kub metr, 2022-yil yanvarda 4,7 milliard kub metr tabiiy gaz qazib olingan va o‘rtadagi tafovut 7,5 foizni tashkil etgan.
2023-yil fevralida 3,8 milliard kub metr, o‘tgan yilning fevralida 4,2 milliard kub metr tabbiy gaz qazib olingan. Qazishning qisqarish hajmi 9 foizni tashkil etgan.
Respublikada elektr energiyasining 85 foizi tabiiy gaz yordamida ishlab chiqariladi. Gaz qazib olish hajmining kamayib borayotgani, elektr energiyasi ishlab chiqarishga ham o‘z taʼsirini o‘tkazadi.
Agentlik hisobotida joriy yilning yanvar-mart oylarida elektr energiyasi ishlab chiqarish hajmi ham qisqarganini ko‘rish mumkin.
Masalan, 2023-yilning mart oyida 5,9 milliard kVt soat, 2022-yil martida 6,6 milliard kVt soat elektr energiyasi ishlab chiqarilgan. Bu o‘tgan yilning tegishli davriga nisbatan 10,6 foizga kam degani.
Joriy yil yanvarida 6,5 milliard kVt soat, fevralida 6 milliard kVt soat elektr energiyasi ishlab chiqarilgan bo‘lsa, 2022-yil yanvarida 6,7 milliard kVt soat, fevralida 6,2 milliard kVt soat ishlab chiqarilgan.
Izoh (0)