Жанубий Африка республикасидаги (ЖАР) ҳукмрон Африка миллий конгресси партияси мамлакатни Халқаро жиноий суд (ХЖС) юрисдикциясидан чиқаришга қарор қилди. Бу ҳақда ЖАР президенти Сирил Рамафоснинг баёнотига таяниб, International Business Times хабар берди.
Нашрнинг ёзишича, Жанубий Африка республикаси ҳукуматининг бундай қарорига “ХЖСнинг айрим давлатларга нисбатан адолатсиз муносабати” сабаб бўлган.
“Суднинг адолатсиз муносабатда бўлиш масаласини тўғри муҳокама қилиш керак, деб ҳисоблаймиз, аммо ҳукмрон партия яна бир бор мамлакат ХЖС таркибидан чиқиши керак, деган қарорга келди”, — дейди Рамафоса.
Ўз навбатида, “ТАСС” ЖАР президентининг расмий вакилига таяниб, мамлакатнинг ХЖСдан чиқиши бўйича якуний қарорни миллий парламент қабул қилиши кераклигини ёзади.
Путинни ҳибсга олиш ордери
17 март куни Гаагадаги Халқаро жиноий суд Россия президенти Владимир Путинни ҳибсга олишга ордер берди. У Украинанинг босиб олинган ҳудудларидан болаларни Россияга ноқонуний депортация қилишда гумон қилинмоқда. Худди шундай ордер Болалар омбудсманı Мария Лвова-Беловага нисбатан ҳам чиқарилган.
2023 йил августда БРИКС саммити ЖАРда бўлиб ўтади, унга Владимир Путин таклиф қилинган. Шу муносабат билан мамлакат расмийлари Россия билан маслаҳатлашувлар ўтказишга ваъда берган, чунки Халқаро жиноий суд юрисдикциясини тан олган ҳар қандай давлат унинг қарорларини бажариши, жумладан, ҳибсга олиш учун ордер берилган шахсларни Гаагага экстрадиция қилиши керак.
2015 йилда Судан президенти Умар ал-Башир Жанубий Африкага учиб кетган, ХЖС унинг ҳибсга олиниши учун ордер берганди. Маҳаллий суд ал-Баширга экстрадиция масаласи кўриб чиқилаётган вақтда мамлакатни тарк этишни тақиқлаган, бироқ эртаси куни Судан президенти ўз мамлакатига қайтган. Жанубий Африка ҳуқуқ-тартибот идоралари бунга тўсқинлик қилмаган. Кейинроқ мамлакат расмийлари ХЖС таркибидан чиқишга уринган, бироқ Олий суд кейин бу қарорни конституцияга зид деб топган.
Изоҳ (0)