Agar Rossiya prezidenti Vladimir Putin Germaniyaga kelsa, mahalliy hokimiyat uni hibsga olib, Xalqaro jinoiy sud vakillariga topshiradi. Bu haqda Germaniya adliya vaziri Marko Bushmannga tayanib, Bild xabar berdi.

“Xalqaro jinoyat sudi (XJS) tezkorlik bilan Interpol bilan bog‘lanadi va ijroni talab qiladi. Shundan so‘ng Germaniya Putinni hibsga olishga va Germaniya hududiga kirsa, uni XJSga topshirishga majbur bo‘ladi”, — dedi Bushmann.

U agar “Putin Germaniya hududiga qadam bossa” XJS talabini bajarishini, chunki mamlakat sud yurisdiksiyasiga bo‘ysunishini bildirdi.

Bunga javoban Rossiya Tergov qo‘mitasi raisi Aleksandr Bastrikin Germaniya adliya vazirining Rossiya fuqarolarining Germaniyada hibsga olingani haqidagi bayonotlariga huquqiy baho berishni topshirdi. Ukraina prezidenti ofisi rahbari maslahatchisi Mixail Podolyak ham bunga munosabat bildirdi.

“Birinchi bo‘lib aynan Germaniya bunga qattiq urg‘u berishi ramziy ma’noga ega. Ularning yurisdiksiyasida mamlakatda Putin paydo bo‘lsa, u ukrainalik bolalarga nisbatan ommaviy o‘g‘irlash va tajovuzkor zo‘ravonlikni uyushtirgani uchun darhol hibsga olinadi”, — dedi Mixail Podolyak.

Ma’lumot o‘rnida, Germaniya kansleri Olaf Shols Xalqaro jinoiy sud tomonidan Rossiya prezidenti Vladimir Putinni “qamoqqa olish orderi” chiqarilganini olqishlagan. 

“Xalqaro jinoiy sud urush jinoyatlarini tergov qilish uchun to‘g‘ri institutdir. Gap shundaki, hech kim qonundan ustun emas va bu ravshan bo‘lib bormoqda”, — dedi siyosatchi.

Putinni hibsga olish orderi

XJS 17-mart kuni Vladimir Putin va bolalar ombudsmani Mariya Lvova-Belovani hibsga olishga order berdi. Ular ukrainalik bolalarni Rossiyaga majburan deportatsiya qilishda ayblanmoqda.

Putin Rim statusini ratifikatsiya qilgan dunyoning 123 ta davlatidan istalganida tribunal talabiga binoan hibsga olinishi mumkin. Ular orasida Tojikiston ham bor.