Ijtimoiy tarmoqlarda Respublika maʼnaviyat va maʼrifat markazi Qo‘rg‘ontepa tumani bo‘linmasi rahbari maktab targ‘ibotchilarini majburiy mehnatga jalb etgani yuzasidan xabarlar tarqaldi. Ushbu holat yuzasidan viloyat kambag‘allikni qisqartirish va bandlik bosh boshqarmasi munosabat bildirdi.
Taʼkidlanishicha, holat boshqarmaning davlat mehnat nazorati inspeksiyasi tomonidan o‘rganilgan.
O‘rganish davomida G.Q. Respublika maʼnaviyat va maʼrifat markazi Qo‘rg‘ontepa tumani bo‘linmasi rahbari vazifasidan ishlab kelib, tumandagi taʼlim muassasalarida ishlovchi olti nafar targ‘ibotchilarni ularning xohishiga zid ravishda mehnat vazifalariga kirmaydigan ishlarga jalb qilgani aniqlangan. Targ‘ibotchilar mas’ulga tegishli xonadon va yordamchi xo‘jalikda obodonlashtirish, tozalash ishlarini qilishga majburlagan.
Mazkur holat yuzasidan G.Q.ga nisbatan Maʼmuriy javobgarlik to‘g‘risidagi kodeksning 51-moddasi (mehnatga maʼmuriy tarzda majburlash)ga asosan bazaviy hisoblash miqdorining 50 barobari (15 million so‘m) miqdorida maʼmuriy jarima qo‘llanilgan.
Izoh (0)