O‘zbekistonning birinchi mintaqaviy aviakompaniyasi Silk Avia 25-aprel kuni o‘zining ilk tijoriy reyslarini amalga oshiradi, deb xabar bermoqda Uzbekistan Airports matbuot xizmati.
Birinchi reyslar quyidagi yo‘nalishlarda amalga oshiriladi:
- Toshkent—Termiz—Toshkent (haftasiga 2 marta);
- Toshkent—Navoiy—Toshkent (haftasiga 2 marta);
- Toshkent—Namangan—Toshkent (haftasiga 4 marta);
- Toshkent—Qarshi—Toshkent (haftasiga 4 marta);
- Toshkent—Buxoro—Urganch—Buxoro—Toshkent (haftasiga 5 marta);
- Toshkent—Samarqand—Urganch—Samarqand—Toshkent (haftasiga 7 marta).
Qayd etilishicha, birinchi bosqichda parametrlari va narxi bilan farq qiluvchi uchta tarif ishlab chiqildi. Eng qulay, “Oddiy” tarifi yengil sayohatlar uchun juda mos. Chipta narxi faqat 5 kilogramm og‘irlikdagi qo‘l yukini ko‘zda tutadi (sumka maxsus o‘lchamga sig‘ishi kerak — 40×30×20 santimetr) va bagaj, pulni qaytarish va chiptalarni qayta bron qilishni nazarda tutmaydi.
“Oson” tarifi ham bagajsiz va budjet tarifidan chipta pulini qaytarish yoki uni boshqa sanaga qayta bron qilish imkoniyati bilan farqlanadi. Ushbu yo‘nalishdagi eng qimmat “Omad” tarifiga 20 kilogacha bo‘lgan bagaj, qayta bron qilish va chiptani qaytarish kiradi.
Aviachiptalar narxi 180 000 so‘mdan boshlanadi. Biroq eng qimmat tarif narxini hisobga olgan holda ham, aviachiptalar narxi boshqa aviakompaniyalarning mavjud tariflaridan 50 foizgacha arzon. 30-aprelgacha barcha yo‘nalishlarga chiptalar, shu jumladan, “qaytariladigan” va “bagajli” chiptalar eng arzon “Oddiy” tarifi narxida — marshrutga qarab 17 yevrodan 35 yevrogacha sotiladi.
“Bizning vazifamiz odamlarni respublika bo‘ylab A nuqtadan B nuqtaga tez, ishonchli va arzon tashiydigan kam budjetli aviakompaniya yaratish edi. Parvozlar vaqti qisqa – bir soatdan ikki soatgacha. Bortda ovqatlanish, ko‘rpa-to‘shak, yostiq, salfetka va chipta narxini sezilarli darajada oshiradigan boshqa narsalar yo‘q. Biz faqat 0,25 litrli plastik qadoqlarda suv tarqatamiz. Buning evaziga aviachipta narxini temiryo‘l transporti narxiga yaqinlashtirishga muvaffaq bo‘ldik”, — deyiladi aviakompaniya matbuot xizmati xabarida.
Izoh (0)