Farg‘ona viloyati Qo‘qon shahrida korxona xodimi ish vaqtida halok bo‘ldi. Bu haqda “Zamon” dasturida xabar berildi.
Xabarga ko‘ra, fuqaro D. Qo‘qon shahridagi MCHJ rahbari lavozimida ishlab kelib, texnika xavfsizligi va mehnatni muhofaza qilishning boshqa qoidalariga rioya qilishga masʼul shaxs bo‘lgani holda, fuqaro Y.ni yollanma ishchi sifatida ishga qabul qilgan. U “Mehnatni muhofaza qilish to‘g‘risida”gi qonunning 23- va 25-moddalari talablarini buzib, Y.ni texnologik qurilmalar va ular bilan bog‘liq konstruksiyalar montajchisi vazifasiga tayinlagan.
Shuningdek, xodimni shartnoma asosida yirik zavodlardan birining ishlab chiqarish sexidagi tayyor mahsulotlarni qadoqlash omboriga demontaj ishlarini bajarish uchun jalb etgan. Xodim ish jarayonida xavfsizlik qoidalariga amal qilmagan holda, balandligi 18 metr bo‘lgan uchta qadoqlash bunkerining tayanch qismlarini bezak yordamida kesgan vaqtda bunkerlar qulab tushgan. Qurilmaning ostida qolgan xodim hodisa joyida halok bo‘lgan.
Holat yuzasidan yuritilgan jinoyat ishi Qo‘qon sudida ko‘rib chiqildi. Sudlanuvchi aybiga to‘liq iqrorligini, jabrlanuvchining oila aʼzolariga moddiy yordam ko‘rsatgani, marhumning dafn marosimlarini o‘tkazgani, uning rafiqasi hisob raqamiga ko‘p miqdorda pul qo‘ygani va boshqa jihatlarni inobatga olib, suddan yengillik so‘radi.
Qayd etilishicha, aybdor qilmishidan chin ko‘ngildan pushaymonligi, muqaddam sudlanmagani, nafaqa yoshidaligi, yetkazilgan zarar to‘liq qoplanib, jabrlanuvchining qonuniy vakilining unga nisbatan daʼvosi yo‘qligi inobatga olinib, jarima jazosi tayinlandi.
Izoh (0)