Ўзбекистоннинг биринчи минтақавий авиакомпанияси Silk Avia 25 апрель куни ўзининг илк тижорий рейсларини амалга оширади, деб хабар бермоқда Uzbekistan Airports матбуот хизмати.
Биринчи рейслар қуйидаги йўналишларда амалга оширилади:
- Тошкент—Термиз—Тошкент (ҳафтасига 2 марта);
- Тошкент—Навоий—Тошкент (ҳафтасига 2 марта);
- Тошкент—Наманган—Тошкент (ҳафтасига 4 марта);
- Тошкент—Қарши—Тошкент (ҳафтасига 4 марта);
- Тошкент—Бухоро—Урганч—Бухоро—Тошкент (ҳафтасига 5 марта);
- Тошкент—Самарқанд—Урганч—Самарқанд—Тошкент (ҳафтасига 7 марта).
Қайд этилишича, биринчи босқичда параметрлари ва нархи билан фарқ қилувчи учта тариф ишлаб чиқилди. Энг қулай, “Оддий” тарифи енгил саёҳатлар учун жуда мос. Чипта нархи фақат 5 килограмм оғирликдаги қўл юкини кўзда тутади (сумка махсус ўлчамга сиғиши керак — 40×30×20 сантиметр) ва багаж, пулни қайтариш ва чипталарни қайта брон қилишни назарда тутмайди.
“Осон” тарифи ҳам багажсиз ва бюджет тарифидан чипта пулини қайтариш ёки уни бошқа санага қайта брон қилиш имконияти билан фарқланади. Ушбу йўналишдаги энг қиммат “Омад” тарифига 20 килогача бўлган багаж, қайта брон қилиш ва чиптани қайтариш киради.
Авиачипталар нархи 180 000 сўмдан бошланади. Бироқ энг қиммат тариф нархини ҳисобга олган ҳолда ҳам, авиачипталар нархи бошқа авиакомпанияларнинг мавжуд тарифларидан 50 фоизгача арзон. 30 апрелгача барча йўналишларга чипталар, шу жумладан, “қайтариладиган” ва “багажли” чипталар энг арзон “Оддий” тарифи нархида — маршрутга қараб 17 евродан 35 еврогача сотилади.
“Бизнинг вазифамиз одамларни республика бўйлаб А нуқтадан Б нуқтага тез, ишончли ва арзон ташийдиган кам бюджетли авиакомпания яратиш эди. Парвозлар вақти қисқа – бир соатдан икки соатгача. Бортда овқатланиш, кўрпа-тўшак, ёстиқ, салфетка ва чипта нархини сезиларли даражада оширадиган бошқа нарсалар йўқ. Биз фақат 0,25 литрли пластик қадоқларда сув тарқатамиз. Бунинг эвазига авиачипта нархини темирйўл транспорти нархига яқинлаштиришга муваффақ бўлдик”, — дейилади авиакомпания матбуот хизмати хабарида.
Изоҳ (0)