O‘zbekiston yuridik kadrlarni tayyorlashda Xitoy bilan hamkorlik qiladi

O‘zbekiston Xitoy bilan yuridik kadrlarni tayyorlashda hamkorlik qilishi kutilmoqda. Bu haqda “Dunyo” xabar berdi. 

Xabarga ko‘ra, O‘zbekiston elchixonasi tashabbuskorligida Chunsin shahridagi Xitoy Janubiy – G‘arbiy siyosiy fanlar va huquq universitetida davra suhbati tashkil etildi. Tadbir O‘zbekistonda oliy taʼlim sohasida, xususan, yuridik kadrlarni tayyorlash borasida amalga oshirilayotgan islohotlar mavzusiga bag‘ishlandi.

Uchrashuvda mamlakatda yurisprudensiya mutaxassisligi bo‘yicha kadrlar tayyorlash, qayta tayyorlash borasida Yaponiya, Germaniya, Buyuk Britaniya va Xitoy kabi davlatlarning tajribalari o‘rganilayotgani qayd etildi.

Xitoy tomoni suhbat davomida Toshkent davlat yuridik universiteti bilan hamkorlik to‘g‘risida memorandum imzolash va uning dorasida mazkur universitetlar qoshida Xitoy va O‘zbekiston huquqini o‘rganish markazlarini tashkil etishga tayyor ekanini bildirdi.

Qayd etilishicha, memorandumning imzolanishi kelajakda o‘zaro hamkorlikda ilmiy-tadqiqot loyihalarini amalga oshirish, qo‘shma taʼlim va ilmiy dasturlarni yo‘lga qo‘yish, professor-o‘qituvchilar va xodimlar uchun malaka oshirish va amaliyot o‘tash dasturlarida ishtirok etish uchun keng imkoniyatlar yaratishi, shuningdek, talabalar almashuvini yo‘lga qo‘yish, hamkorlikda turli tanlovlar, konferensiya, seminar va davra suhbatlarini o‘tkazish uchun huquqiy asos bo‘lib xizmat qilishi taʼkidlandi.