Investitsiyalar, sanoat va savdo vaziri Laziz Kudratov Markaziy Osiyo va Xitoy hududlari rahbarlari forumi o‘tkazishni taklif qildi. Bu haqda vazirlik axborot xizmati xabar berdi.
Ma’lum qilinishicha, 18-aprel kuni vazir videokonferensiya tarzida Markaziy Osiyo—Xitoy tashqi iqtisodiy va tashqi savdo faoliyatiga mas’ul vazirlarning birinchi yig‘ilishida ishtirok etgan.
Laziz Kudratov o‘z nutqida mintaqaning ulkan tranzit salohiyatidan samarali foydalanish muhimligini, shuningdek, yuk tashishning uzluksizligini ta’minlash va transchegaraviy logistika tarmoqlarini rivojlantirish bo‘yicha tizimli yechimlarni ishlab chiqish zarurligini ta’kidlagan.
Hududlararo rivojlanishni chuqurlashtirish bo‘yicha ishlarni davom ettirish muhimligi ta’kidlangan. Biznes hamjamiyatlari o‘rtasidagi hamkorlikni mustahkamlash va yangi o‘sish nuqtalarini kashf etish maqsadida 2023-yilning ikkinchi yarmida O‘zbekistonda Markaziy Osiyo davlatlari va Xitoy hududlari rahbarlarining forumini o‘tkazish taklif etilgan.
Raqamli savdoni kengaytirish doirasida o‘zaro hamkorlikni faollashtirish istiqbollari muhokama qilindi. “Raqamlashtirish davrida iqtisodiyot va savdoni rivojlantirish dasturi”ni ishlab chiqish tashabbusi ilgari surildi. Unda mintaqa mamlakatlari IT-parklari negizida “Intellektual Ipak yo‘li” qo‘shma platformasini yaratish ko‘zda tutilgan. Uchrashuv ishtirokchilari imzolanishi rejalashtirilgan savdo-iqtisodiy hamkorlikni mustahkamlash, mintaqa doirasida raqamli savdo sohasida hamkorlik qilish bo‘yicha memorandumlar muvaffaqiyatli kelishilganini mamnuniyat bilan qayd etgan.
Izoh (0)