Яманда хайрия тадбирида юзага келган тиқилинчда 80 киши ҳалок бўлди (видео)

Яман пойтахти Сано марказида хайрия тадбири чоғида юз берган тиқилинчда 50 дан ортиқ одам ҳалок бўлди, деб хабар бермоқда Ал Арабия.

Шу билан бирга, мамлакат Соғлиқни сақлаш вазирлиги расмийларининг айтишича қурбонлар сони камида 80 кишини ташкил қилмоқда.

Журналистлар маълумотларига кўра, одамлар Боб ал-Яман туманида тадбиркорлардан моддий ёрдам — закот олиш учун йиғилган. Юзлаб одамлар тор кўчада тўпланиб, пул тарқатилаётган жойга яқинлашишга уринган.

“Аввалига ўқ овозлари эшитилди, кейин қисқа туташув содир бўлди, натижада чироқлар ўчди, бу эса ваҳима ва тиқилинчга сабаб бўлди”, — дейди манба.

Дастлабки маълумотларга кўра, фожиа бир ҳаракат ортидан содир бўлган. Ёрдам тарқатувчилардан бири оломонни тинчлантириш учун ҳавога ўқ узган, бироқ ўқ электр симига тегиб кетган. Бундан қўрқиб кетган одамлар ваҳима кўтаришган, кейин тиқилинч бошланган.

Закот икки савдогар томонидан тарқатилаётган эди. Полиция уларни ҳибсга олган. Улар “Ички ишлар вазирлиги билан келишилмаган ҳолда ва ташкилотсиз пул маблағларини тартибсиз тарқатиш”да айбланмоқда.