Жорий йилнинг март ойида республикада газ қазиб олиш ҳажми 12,2 фоизга, электр энергияси ишлаб чиқариш 10,6 фоизга қисқарди.
Ўзбекистонда газ қазиб олиш ва электр энергияси ишлаб чиқариш ҳажмининг қисқариши жорий йилда учинчи ой кетма кет давом этмоқда. Бу ҳақда Статистика агентлиги ҳисоботида маълум қилинган.
Республикада 2023 йил март ойида 4,1 миллиард куб метр табиий газ қазиб олинди. Таққослаш учун, 2022 йилнинг мартида 4,7 миллиард куб метр газ қазиб олинганди. Бу кўрсаткич ўтган йилнинг мартига нисбатан 12,2 фоизга кам.
Жорий йил чорагида газ қазиб олиш ҳажмида ўтган йилга қараганда сезиларли қисқариш кузатилмоқда. Масалан, 2023 йил январь ойида 4,3 миллиард куб метр, 2022 йил январда 4,7 миллиард куб метр табиий газ қазиб олинган ва ўртадаги тафовут 7,5 фоизни ташкил этган.
2023 йил февралида 3,8 миллиард куб метр, ўтган йилнинг февралида 4,2 миллиард куб метр таббий газ қазиб олинган. Қазишнинг қисқариш ҳажми 9 фоизни ташкил этган.
Республикада электр энергиясининг 85 фоизи табиий газ ёрдамида ишлаб чиқарилади. Газ қазиб олиш ҳажмининг камайиб бораётгани, электр энергияси ишлаб чиқаришга ҳам ўз таъсирини ўтказади.
Агентлик ҳисоботида жорий йилнинг январь март ойларида электр энергияси ишлаб чиқариш ҳажми ҳам қисқарганини кўриш мумкин.
Масалан, 2023 йилнинг март ойида 5,9 миллиард кВт соат, 2022 йил мартида 6,6 миллиард кВт соат электр энергияси ишлаб чиқарилган. Бу ўтган йилнинг тегишли даврига нисбатан 10,6 фоизга кам дегани.
Жорий йил январида 6,5 миллиард кВт соат, февралида 6 миллиард кВт соат электр энергияси ишлаб чиқарилган бўлса, 2022 йил январида 6,7 миллиард кВт соат, февралида 6,2 миллиард кВт соат ишлаб чиқарилган.
Изоҳ (0)