Olmaliqda qurilishi to‘xtatilgan uy haqida qo‘shimcha tafsilotlar ochiqlandi: 9 qavatli uyning 3 qavati buzilishi mumkin

Toshkent viloyatining Olmaliq shahrida qurilayotgan ko‘p qavatli uylardan birining qurilish talablariga rioya etilmasdan barpo etilayotgani, kelajakda bu uyda yashash inson hayoti uchun xavfli ekani aytilgan video tarqaldi. Mazkur holatga munosabat bildirgan Qurilish vazirligi ushbu turar joy binosini qurishda “Zilzilaviy hududlarda qurilish” meʼyor talablari buzilgani-yu, geolog dalolatnomasi va zamin tuproq qatlami zichligi bo‘yicha laboratoriya xulosalari to‘liq rasmiylashtirilmagan holda qurilayotganini bildirdi.

“Daryo” jamoatchilikning ushbu ko‘p qavatli uyning kelajakdagi taqdiri nima bo‘ladi, uy imi-jimida foydalanishga topshirib yuborilmaydimi degan qator savollariga javob olish maqsadida ushbu qurilish obyektiga borib, quruvchi va qurilishga masʼul xodimlar bilan suhbatlashdi.

“Video muallifining armaturalar ingichkaligiga eʼtiroziga javoban shuni aytamanki, loyihada o‘nlik armatura qo‘yilishi belgilangan bo‘lib, standart talab ham shu bo‘lgan. Qolaversa qurilish ishlari tugatilmagan va videoda chala ishlar ko‘rsatilgan. Shuningdek, video muallifi beton judayam sifatsiz ekanini aytib, qo‘lda elanib ketayotganini aytgan. Aslida u ushlab ko‘rsatgan beton qoldiqlari qurilish ishlari paytida yuzaga kelgan beton qoldiqlari hisoblanadi. Aynan beton emas. Beton juda mustahkam quyilgan”, — deydi shu ko‘p qavatli uy quruvchisi bo‘lgan “Orient avto universal“ qurilish tashkiloti rahbari Umid Sevinchov.

Quruvchining “Daryo”ga bildirishicha, u qurayotgan uyning kamchiliklari ko‘ringan videoni unga tanish va u bilan hamkorlikda ishlagan fuqaro tavsirga olgan.

“Bu videoni menga tanish fuqaro ancha avval tasvirga olgan. Va shu kunlarda tarqatdi. U uy xaridori emasdi. Men undan qurilishda kerak bo‘ladigan qurilish asboblarini olib turgandim. U berib turgan qurilish asbobining ijara narxini 80 million so‘m degach, bu qimmat arzonlashtiring degandim. Keyin naqd bo‘lsa 60 million bering degandi. Pulini bergandim”, — deydi videotasvirlar qanday tarqalganini aytgan quruvchi.

Qurilish ishlarida texnik nazoratchi sifatida ishlagan Aziz Olovxonovning aytishicha, to‘qqiz qavat bo‘lib qad rostlagan uyning 8- va 9-qavatlari talabga javob bermaydi.

“Mazkur ‘dom’ning 1–6-qavatlari talabga javob beradigan darajada qurilgan. Keyingi qavatlarda nazorat yo‘qolib, ishlar sifati buzilgan. Bu bo‘yicha biz quruvchini qayta-qayta ogohlantirganmiz. Avvaliga og‘zaki ogohlantirish berdik, keyin yozma tarzda ogohlantirib, kamchiliklarni bartaraf etish bo‘yicha qilinishi kerak bo‘lgan ishlarni aytdik. Ammo amal qilinmagani sabab, bugungi kunda shunday vaziyat yuzaga kelgan”, — deydi Aziz Olovxonov.

Quruvchi Umid Sevinchov qurilishdagi kamchiliklar yuzasidan unga ogohlantirish berilganini, ammo kamchiliklarni bartaraf etmaganini tan oldi.

“O‘zim moliya sohasi mutaxassisiman. Qurilish ishlari bilan ikki yildan beri shug‘ullanib kelyapman. Bundan avval aholi uchun turar joy binolarini qurmaganman. Agar qurilish ishlari talabga javob berilmasligi aytilib, 7–8–9-qavatlar buzilishi kerakligini aytishsa, buzamiz, boshqa imkonimiz ham yo‘q”, — deydi quruvchi.

Aniqlanishicha, mazkur uy qurilishi 2021-yil noyabr oyidan boshlangan bo‘lib, loyiha qiymati 10,5 milliard so‘mni tashkil qiladi. Turar joy binosining kv/metri aholiga subsidiya asosida 5 million 187 ming so‘mdan sotiladi.

Toshkent viloyati qurilish sohasi hududiy inspeksiyasi inspektori Maʼruf Majidovning maʼlumot berishicha, mazkur obyektdagi qurilish ishlari boshlangan paytda qurilish ishlarini boshlash uchun talab etiladigan 11 turdagi hujjat masʼullar tomonidan tasdiqlanmagani bois, quruvchiga qurilish ishlarini to‘xtatish bo‘yicha yozma ko‘rsatma berilgan.

“Quruvchi belgilangan talablarni bajarmagani sabab 2023-yilning 14-mart kuni qurilishni to‘xtatib, tashkilot rahbarini maʼmuriy javobgarlik bo‘yicha 4,5 million so‘m miqdorida jarimga tortdik”, — deydi masʼul.

Maʼruf Majidovning qo‘shimcha qilishicha, endilikda mazkur ko‘p qavatli uyning avvaliga zilzilaga bardoshliligi o‘rganiladi. Bino zilzilaga bardoshli deb topilgach, 7–8–9-qavatlarning kamchiliklari bartaraf etilishi lozim bo‘ladi.

“Agar qo‘shimcha taʼmirlash ishlari orqali kamchiliklarni bartaraf etish imkoni bo‘lmasa, binoning talabga javob bermagan qavatlari buzilib, qayta quriladi”, — deydi Maʼruf Majidov.

Toshkent viloyati qurilish sohasida hududiy nazorat inspeksiyasi boshlig‘i birinchi o‘rinbosari Otabek Tillaxo‘jayevning “Daryo”ga bildirishicha, mazkur ko‘p qavatli uyning qurilishi vazirlik nazoratiga olingan bo‘lib, kelajakda odamlar hayoti uchun xavfsiz deb topilsagina qurilish ishlari davom ettiriladi. Masʼulning aytishicha, mutaxassislar fikriga qarab, mazkur bino tag-tugi bilan buzib tashlanishi ham mumkin.

“Mutaxassislar qanday fikr bersa shunga amal qilinadi. Balki bino tag-tugi bilan buzib tashlanib, qayta qurilishi ham mumkin. Yoki pastki qavatlar talabga javob beradi degan xulosa berilsa, yuqori qavatlari buzilib, qayta qurilishi mumkin”, — deydi Otabek Tillaxo‘jayev.

Otabek Tillaxo‘jayevning maʼlumot berishicha, Toshkent viloyatida qurilish sifatini tekshiruvchi tashkilot nazoratida 3207 ta obyekt mavjud bo‘lib, nazoratchilarning har biriga 140-150 tadan obyekt to‘g‘ri keladi.

Taʼkidlanishicha, Toshkent viloyati qurilish sohasida hududiy nazorat inspeksiyasi tomonidan 2022-yil davomida 19635 ta monitoring tadbirlari amalga oshirilgan bo‘lib, 801 ta obyekt egasiga maʼmuriy javobgarlik belgilangan. 8207 ta obyekt egasiga kamchiliklarni bartaraf etish yuzasidan yozma ogohlantirish berilgan.