Qashqadaryoda sog‘lom odamni ruhiy kasalxonaga ro‘yxatga qo‘ygan bosh shifokor qo‘lga olindi (video)

Qashqadaryo viloyatining Mirishkor tumanida ruhiy kasalliklar dispanseri bosh shifokori qo‘lga olindi. 

Ma’lum qilinishicha, DXX va Bosh prokuratura huzuridagi departament xodimlari hamkorlikda tezkor tadbir o‘tkazgan. Tadbirda Qashqadaryo viloyati 1-sonli asab-ruhiy kasalliklar dispanseri bosh shifokori vazifasini bajaruvchi va vrachlar maslahati komissiyasi raisi lavozimida ishlovchi U.I. ushlangan.

Aniqlanishicha, u fuqarolardan birini dispanserda yotib davolangani to‘g‘risida kasallik tarixini to‘ldirgan va uni ruhiy kasal sifatida ro‘yxatga qo‘ygan. Uning ruhiy holatida o‘zgarish bo‘lgani sababli mehnatga layoqatsizligi haqida xulosa berish evaziga qariyb 400 dollar berishni talab qilgan.

Aslida fuqaro dispanserga kelmagan bo‘lsa ham shifokor rasmiy hujjatlarni qalbakilashtirib, xizmat xonasida ishlov berilgan 4,3 million so‘m pullarni olayotgan vaqtida qo‘lga olingan.

Mazkur holat yuzasidan Jinoyat kodeksining tegishli moddalari bilan jinoyat ishi qo‘zg‘atilib, tergov harakatlari olib borilmoqda.

2022-yil dekabrda Qashqadaryo viloyatining Qarshi tumanida tibbiyot birlashma bosh shifokori 500 dollar pora bilan qo‘lga tushgani to‘g‘risida xabar berilgandi. Shuningdek, avgust oyida Andijon viloyatining Jalaquduq tumanida pora evaziga hamshiralikka ishga kiritib qo‘ymoqchi bo‘lgan shaxs ushlangan edi.