O‘zbekiston prezidenti Shavkat Mirziyoyev Ramazon hayitini nishonlash to‘g‘risidagi qarorni imzoladi. Bu haqda Prezident matbuot xizmati xabar berdi.
Qarorga muvofiq, Ramazon hayitining birinchi kuni 21-aprel – juma kuniga to‘g‘ri kelishi to‘g‘risida O‘zbekiston musulmonlari idorasi Ulamolar kengashi tomonidan qabul qilingan qarorni inobatga olib, mamlakatda 21-aprel kuni Ramazon hayiti bayrami sifatida keng nishonlanadi.
Aholining Ramazon hayiti bayramini munosib kutib olishi va yuksak saviyada o‘tkazishi uchun qulay shart-sharoit yaratish maqsadida 24-aprel (dushanba) kuni ish haftasining turidan qatʼiy nazar barcha xodimlar uchun qo‘shimcha dam olish kuni sifatida belgilandi. Shu tariqa:
- 21-aprel, juma — Hayit bayrami;
- 22-aprel, shanba — 6 kunlik ish haftasidagi xodimlar uchun qo‘shimcha dam olish kuni;
- 23-aprel, yakshanba — odatdagi dam olish kuni;
- 24-aprel, dushanba — barcha uchun dam olish kuni bo‘ladi (Ya’ni ushbu kun hisobidan haftasiga 5 kun ishlovchi xodimlar boshqa kuni ishlab berishi shart bo’lmaydi, ular uchun 29-aprel, shanba kuni ham dam olish kuni bo’ladi).
Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklari Din ishlari bo‘yicha qo‘mita hamda hamkor tashkilotlar bilan birgalikda Ramazon hayiti xalqning milliy anʼana va qadriyatlariga mos ravishda o‘tkazilishi uchun tegishli chora-tadbirlarni amalga oshiradi.
Madaniyat va turizm vazirligi Transport vazirligi bilan birgalikda yurtdoshlarimizga muborak Ramazon hayiti kunlarida mo‘tabar ziyoratgohlar va tarixiy qadamjolarga ziyoratlarini tashkil etish maqsadida qulay sharoit va imkoniyatlar yaratadi.
O‘zbekiston musulmonlari idorasi mamlakatda Ramazon hayiti 21-aprel, juma kuniga to‘g‘ri kelishi haqida qaror qabul qildi. Toshkent shahri masjidlarida Ramazon hayiti namozi o‘qilishi munosabati bilan maxsus avtobus yo‘nalishlari tashkil etilmoqda, shuningdek, Ramazon hayiti kunlarida Toshkent metropoliteni ish jadvali o‘zgaradi.
Izoh (0)