O‘zbekiston dunyodagi shakar isteʼmoli o‘rtacha bo‘lgan davlatlar qatoriga kiradi. Bu haqda Landgeist xabar berdi.
“Yevropa va Shimoliy Amerika aholisi dunyoda eng ko‘p shakar iste’mol qiladigan xalq bo‘lsa-da, ayrim Osiyo, xususan, Yaqin Sharq davlatlari ham eng ko‘p shakar iste’mol qiladigan mamlakatlar hisoblanadi”, — deyiladi xabarda.
Ma’lumotlarga ko‘ra, Bahrayn (44,3 kilogramm) aholi jon boshiga shakar isteʼmoli bo‘yicha Osiyoda birinchi o‘rinda turadi va dunyodagi eng yuqori ko‘rsatkichga ega davlatlardan biridir. Livan (43,4 kilogramm) va Malayziyada (41,6 kilogramm) ham shakar isteʼmoli juda yuqori.
Eng past ko‘rsatkichlar Myanma (2,9 kilogramm), Shimoliy Koreya (4,5 kilogramm) va Bangladeshda (6,3 kilogramm) qayd etilgan.
O‘zbekistonda esa yiliga aholi jon boshiga 17,8 kilogramm shakar isteʼmol qilinadi. Bu ko‘rsatkich bo‘yicha mamlakat Turkmaniston (18,7 kilogramm), Tojikiston (16,8 kilogramm) va Yaponiya (17,2 kilogramm) bilan bir qatordan joy olgan.
Shakar glyukoza shaklida tez energiya beradi, u organizm tomonidan darhol hazm qilinadi yoki keyinchalik foydalanish uchun saqlanadi. Bu oziq-ovqat va ichimliklar taʼmiga ham taʼsir qiladi. Shu bilan birga, shakarni haddan tashqari ko‘p isteʼmol qilish sog‘liq uchun bir qator salbiy taʼsirlarga, masalan, vazn ortishi, tishlarning parchalanish xavfi ortishi va qonda shakar miqdorining ko‘payishi, oqibatda 2-toifa diabet yuzaga kelishi kabi baʼzi surunkali kasalliklarga olib kelishi mumkin.
O‘zbekistonda shakar mahsuloti zaxirasi
Ichki bozorni shakar mahsuloti bilan uzluksiz taʼminlash maqsadida mahalliy shakar ishlab chiqaruvchilar tomonidan ishlab chiqarish quvvatlarini modernizatsiya qilish ishlari olib borilmoqda va birinchi bosqichida (1-mayga qadar) shakar ishlab chiqarish quvvatlarini o‘tgan yilga nisbatan 25 foizga oshirilishi, natijada sutkasiga 2,5 ming tonnagacha shakar ishlab chiqarilishi rejalashtirilgan. Bunda, yillik shakar ishlab chiqarish 600 ming tonnadan 1 million tonnagacha oshishi kutilmoqda.
Raqobatni rivojlantirish va iste’molchilar huquqlarini himoya qilish qo‘mitasiga ko‘ra, respublika aholisini yetarli miqdorda va maqbul narxlarda shakar va un mahsulotlari bilan taʼminlash bo‘yicha hukumat tomonidan zarur choralar ko‘rilgan.
Bugungi kunda aholiga shakar 11 500—14 000 so‘mdan, ayrim olis hududlarda 12 000—15 000 so‘mgacha chakana narxlarda realizatsiya qilinmoqda.
Izoh (0)