Ўзбекистон аҳолиси Рамазон ҳайитида кетма-кет 4 кун дам олади

Ўзбекистон президенти Шавкат Мирзиёев Рамазон ҳайитини нишонлаш тўғрисидаги қарорни имзолади. Бу ҳақда Президент матбуот хизмати хабар берди.

Қарорга мувофиқ, Рамазон ҳайитининг биринчи куни 21 апрель – жума кунига тўғри келиши тўғрисида Ўзбекистон мусулмонлари идораси Уламолар кенгаши томонидан қабул қилинган қарорни инобатга олиб, мамлакатда 21 апрель куни Рамазон ҳайити байрами сифатида кенг нишонланади.

Аҳолининг Рамазон ҳайити байрамини муносиб кутиб олиши ва юксак савияда ўтказиши учун қулай шарт-шароит яратиш мақсадида 24 апрель (душанба) куни иш ҳафтасининг туридан қатъий назар барча ходимлар учун қўшимча дам олиш куни сифатида белгиланди. Шу тариқа:

• 21 апрель, жума — Ҳайит байрами;
• 22 апрель, шанба — 6 кунлик иш ҳафтасидаги ходимлар учун қўшимча дам олиш куни;
• 23 апрель, якшанба — одатдаги дам олиш куни;
• 24 апрель, душанба — барча учун дам олиш куни бўлади (Яъни ушбу кун ҳисобидан ҳафтасига 5 кун ишловчи ходимлар бошқа куни ишлаб бериши шарт бўлмайди, улар учун 29 апрель, шанба куни ҳам дам олиш куни бўлади).

Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари Дин ишлари бўйича қўмита ҳамда ҳамкор ташкилотлар билан биргаликда Рамазон ҳайити халқнинг миллий анъана ва қадриятларига мос равишда ўтказилиши учун тегишли чора-тадбирларни амалга оширади.

Маданият ва туризм вазирлиги Транспорт вазирлиги билан биргаликда юртдошларимизга муборак Рамазон ҳайити кунларида мўтабар зиёратгоҳлар ва тарихий қадамжоларга зиёратларини ташкил этиш мақсадида қулай шароит ва имкониятлар яратади.

Ўзбекистон мусулмонлари идораси мамлакатда Рамазон ҳайити 21 апрель, жума кунига тўғри келиши ҳақида қарор қабул қилди. Тошкент шаҳри масжидларида Рамазон ҳайити намози ўқилиши муносабати билан махсус автобус йўналишлари ташкил этилмоқда, шунингдек, Рамазон ҳайити кунларида Тошкент метрополитени иш жадвали ўзгаради.