Buxoro viloyatida avtomobil yo‘lining qatnov qismlarida tungi vaqtlarda tilanchilik qilib yurgan voyaga yetmagan shaxslar aniqlandi, deb xabar beradi viloyat IIB axborot xizmati.
Qayd etilishicha, IIB tomonidan maxsus reyd guruhlari tashkil etilib, tilanchilik qilib yurgan bolalar viloyat Voyaga yetmagan bolalar markaziga olib kelingan. Ularning ota-onalari ham muassasaga chaqirilgan.
Aniqlanishicha, ular Ramazon qo‘shig‘ini aytib, haydovchilardan pul so‘rab yurgan. “Bu orqali ular avtomobillar harakatlanishiga xalaqit berib, salbiy holatlar keltirib chiqarishi mumkin”, — deyiladi xabarda.
O‘zbekistonda tilanchilik qilish uchun javobgarlik mavjud
Aeroportlarda, vokzallarda, xiyobonlarda, istirohat bog‘larida, bozorlarda va savdo majmualari hududlarida, shuningdek ularga tutash hududlarda, avtomototransport vositalarini vaqtincha saqlash joylarida, ko‘chalarda, stadionlarda, bekatlarda, yo‘llarning qatnov qismida, moddiy madaniy meros obyektlari joylashgan hududlarda, jamoat transportining barcha turlarida va boshqa jamoat joylarida pul, oziq-ovqat mahsulotlari va boshqa moddiy qimmatliklar berishni faol tarzda so‘rab, tilanchilik bilan shug‘ullanish BHMning bir baravaridan uch baravarigacha (900 ming so‘m) miqdorda jarima solishga yoki 15 sutkagacha muddatga ma’muriy qamoqqa olishga sabab bo‘ladi.
Voyaga yetmagan shaxslarni, keksa yoshdagi shaxslarni, ruhiy holati buzilgan, nogironligi bo‘lgan va boshqa shaxslarni tilanchilik qilishga jalb etish, shuningdek, shaxslarga alkogolli ichimliklarni yoxud giyohvandlik moddalari yoki psixotrop moddalar bo‘lmagan, lekin shaxsning aql-idrokiga ta’sir ko‘rsatuvchi moddalarni majburan iste’mol qildirgan holda ularni tilanchilik qilishga jalb etish BHMning besh baravaridan o‘n baravarigacha (3 million so‘m) miqdorda jarima solishga yoki 15 sutkagacha muddatga ma’muriy qamoqqa olishga sabab bo‘ladi.
Izoh (0)