Bugun, 20-aprel kuni Toshkentda Favqulodda vaziyatlar vazirligi tizimi xodimlari ishtirokida “Konstitutsiya o‘zimizniki” targ‘ibot tadbiri bo‘lib o‘tdi. Bu haqda “Daryo” muxbiri xabar berdi.
Tadbirda vazirlik tizimida faoliyat olib boruvchi xodimlar, shu sohada ishlab, xizmat vaqtida halok bo‘lgan xodimlarning oila aʼzolari, FVVning bo‘lajak xizmatchilari hamda sanʼat va madaniyat vakillari ishtirok etdi.
Favqulodda vaziyatlar vazirligi tizimida turli rahbarlik lavozimlarida halol mehnat qilgan, bugun esa qarilik gashtini surayotgan mehnat faxriysi, zaxiradagi polkovnik Ergash Ikromov so‘zga chiqib, 1996-yildan to bugungacha bo‘lgan davrni esladi. FVV xizmatining shakllanishi, oyoqqa turishi va rivojlanishi haqida gapirib o‘tdi.
21 yoshida, xizmat vazifasini bajarayotgan vaqtda vafot etgan safdor Sunnatilla Karimjonovning otasi Teshaboy Karimjonov ham so‘zga chiqib, agar o‘g‘li hayot bo‘lganida, bu yil 40 bahorni qarshi olgan bo‘lishini aytdi.
Teshaboy Karimjonov farzandi 2004-yili yong‘inni o‘chirish chog‘ida vafot etgani, vafotidan so‘ng “Jasorat” medali bilan taqdirlangani, o‘sha vaqtdan beri oilasidan FVV rahbarlari xabar olib turgani haqida gapirdi.
Shuningdek, tadbirda madaniyat vakillari ishtirokida qo‘shiqlar kuylandi.
“Daryo” muxbiri ushbu tadbirdan fotoreportaj tayyorladi.
Izoh (0)