Samarqand viloyati Kattaqo‘rg‘on tuman obodonlashtirish boshqarmasi tomonidan qurilish materiallari sotib olish uchun 30 million so‘mlik tender o‘tkazildi. “Daryo” muxbiri lot ma’lumotlarini ko‘zdan kechirish jarayonida shubhali holatga duch keldi.
Tender 10—17-aprel kunlari o‘tkazilgan. Unda Kattaming qishlog‘iga piyodalar yo‘lakchasi qurish uchun qurilish materiallari yetkazib berish xizmati o‘ynalgan. Lotning boshlang‘ich narxi 30 million so‘m etib belgilangan.
Xarid savdolarida uchta korxona qatnashgan bo‘lib, “Ustozoda Stroy” MCHJ g‘olib deb topilgan, “Polvontepa Mega Stroy” MCHJ esa zaxira yetkazib beruvchi sifatida ko‘rsatilgan.
Ishtirokchi korxonalarning rahbariyati haqidagi ma’lumotlar ko‘zdan kechirilganda g‘olib “Ustozoda Stroy” korxonasining ta’sischisi va rahbari Ergashev Adham Bahodirovich ekani ma’lum bo‘ldi. E’tiborlisi, unga raqobatchilik qilgan “Polvontepa Mega Stroy”ning rahbari Ergashev Hasan Bahodirovich bo‘lib, bu ikki korxona rahbarlarining qarindoshlik aloqalari mavjud bo‘lishi mumkin. Bundan tashqari, korxonalarning telefon raqamlari ham bir xil. Shuningdek, tadbirkorlik subyektlarining yuridik manzillari ham bir tuman (Kattaqo‘rg‘on)da joylashgan.
“Daryo” muxbiri holat yuzasidan izoh olish maqsadida ishtirokchi korxonalarning telefon raqamiga qo‘ng‘iroq qildi. O‘zini Ergashev Hasan deb tanishtirgan shaxs raqobatchisi Ergashev Adham ammasining o‘g‘li ekanini, ular ikkisi alohida korxonalarga rahbarlik qilishi va sherikchilik aloqalari yo‘q ekanini aytdi.
Izoh (0)