Навоий вилояти Қизилтепа туман ободонлаштириш бошқармаси умумий нархи 71 миллион 180 минг сўмлик 4 та Ўзбекистон байроғини харид қилгани ҳақида хабар қилинган эди. Ободонлаштириш бошқармаси “Дарё”да эълон қилинган материалга муносабат билдирди.
Бошқарма муносабатида айтилишича, байроқ 8х16 метр ўлчамда экани ва у туман марказидаги 60 метр баландликдаги флагштокка илиниши инобатга олиниши лозим.
Бошқарма байроқ оддий рангли матодан эмас, махсус матодан тикилиб, компьютер ёрдамида рангланишини таъкидлаган. Шунингдек, байроқ қуёш нурлари, кучли шамол ва намгарчиликларга чидамли қилиб тайёрланиши кўзда тутилган.
“Маълумот тарқатишда қайсидир маҳсулотнинг фақатгина номига эмас, хусусиятларига ҳам эътибор қаратиш лозим деб ўйлаймиз”, — дейилади хабарда.
“Дарё” ушбу тендер маълумотларини жамоатчилик учун аҳамиятли деб топгани сабаб эълон қилганди. Қизилтепа туман ободонлаштириш бошқармаси берган муносабатида маҳсулот хусусиятларига ҳам эътибор қаратиш лозимлигини таъкидлаган. Аммо “Дарё” мухбири лот саҳифасига бириктирилган маълумотлардан фойдаланган эди ва у ерда юқоридаги техник кўрсаткичлар келтириб ўтилмаган.
Изоҳ (0)