Ўзбекистон ТИВ раҳбари Бахтиёр Саидов Европа Иттифоқининг Марказий Осиё ва инсон ҳуқуқлари бўйича махсус вакиллари Терҳи Хакала ва Имон Гилмор билан музокаралар ўтказди. Бу ҳақда Ташқи ишлар вазирлиги матбуот хизмати хабар берди.
Қайд этилишича, мулоқот чоғида Ўзбекистон билан Европа Иттифоқи ўртасидаги сиёсий, савдо-иқтисодий, маданий-гуманитар ва бошқа соҳалардаги муносабатларнинг долзарб жиҳатлари кўриб чиқилган. Фуқаролик жамиятини ривожлантириш, инсон ҳуқуқлари, гендер тенглиги ва сўз эркинлигини таъминлашда ўзаро ҳамкорлик масалалари юзасидан фикр алмашилган.
Ўзбекистон ва Европа Иттифоқи ўртасида Кенгайтирилган шериклик ва ҳамкорлик тўғрисидаги битимни тезроқ имзолаш муҳимлиги қайд этилган.
Шунингдек, Ўзбекистон—Европа Иттифоқи ва Марказий Осиё—Европа Иттифоқи шаклида турли даражаларда режалаштирилган тадбирлар жадвалига алоҳида эътибор қаратилган.
“Учрашувда минтақавий ва халқаро сиёсатнинг айрим масалалари ҳам кўриб чиқилди”, — дейилади хабарда.
13 апрель куни Самарқандда Афғонистонга қўшни давлатлар вазирларининг тўртинчи учрашуви бўлиб ўтганди. Ўзбекистон раислигида ўтган тадбирда Эрон, Покистон, Россия, Тожикистон, Туркманистон ва Хитой ташқи сиёсат идоралари раҳбарлари иштирок этди ва томонлар Афғонистондаги мавжуд вазият, мамлакатнинг амалдаги расмийлари томонидан жаҳон ҳамжамиятининг асосий талаблари — инклюзив ҳукумат яратиш, афғонистонлик аёлларнинг меҳнат ва таълим олиш имкониятини ҳамда миллий озчиликларнинг ҳуқуқларини таъминлаш каби асосий талабларнинг бажарилиши муҳокама қилинди.
Изоҳ (0)