“Aloqabank” aksiyalarini birlamchi ommaviy joylashtirish (IPO) uchun anderrayter tanladi. Ma’lumotlar tovar-xomashyo birjasi tender bo‘limiga joylashtirilgan.
Arizalar 23—29-mart kunlari qabul qilingan. Hozirda eng yaxshi taklifni tanlash natijalari bo‘yicha bayonnoma shakllantirilgan, biroq tender g‘olibi oshkor etilmagan.
Anderrayter aksiyalarni sotishga yordam beradi. Ularni baholaydi, narx belgilaydi va joylashtirish ishlarida qatnashadi.
“Aloqabank” aksiyalari Xalq IPO’siga chiqarilishi rejalashtirilgan 40 ta davlat kompaniyalaridan biri hisoblanadi. Rejada “Aloqabank”ning 23 mln dona aksiyalarini IPO’ga chiqarish bor.
2022-yilda Vazir Mahkamasi 20 dan ortiq kompaniyalarning IPO va SPO o‘tkazish uchun taxminiy muddatlari ma‘lum qilingandi. Unga ko‘ra, “Aloqabank”ning IPO’si 2023-yilning aprel oyida bo‘lib o‘tishi kerak edi.
2023-yilning fevralida UzAuto Motors IPO o‘tkazgan edi. Savdolar yakuniga ko‘ra, kompaniyaning 56,9 mlrd so‘mlik aksiyalari Respublika fond birjasiga joylashtirilgan. Ularning 80 foizi kompaniyalarga, 20 foizi o‘zbekistonliklar hissasiga to‘g‘ri keladi.
UzAuto Motors IPO orqali 196-220 mlrd so‘m jalb qilmoqchi edi, biroq raqamlar IPO kutilganidek bo‘lmadi.
IPO nima va u oddiy odamlarga nima beradi?
IPO (Initial Public Offering) — birlamchi ommaviy taklif, aksiyalarni fond bozori orqali sotish jarayoni. Bu korxona uchun nafaqat pul jalb qilish, balki yangi bosqichga ko‘tarilib, ommaviy va shaffof bo‘lish yo‘li dir. IPO’dan keyin deyarli barcha narsa o‘zgaradi — hisobot shakllaridan tortib rivojlanish rejalarigacha.
IPO o‘tkazish — xususiylashtirish usullaridan biri. So‘nggi yillarda hukumat kompaniyalarni kimoshdi savdosi va arizalar qabul qilish yo‘li bilan sotish orqali iqtisodiyotdagi ishtirokini kamaytirishga harakat qilmoqda.
Oddiy odamlar uchun bu yirik kompaniyaning ma’lum bir qismining egasi bo‘lish va foydaning bir qismini olish imkoniyatidir.
Xalq IPO’sida esa aksiyalarni faqat O‘zbekiston fuqarolari sotib olishi mumkin bo‘ladi.
Izoh (0)