“Алоқабанк” акцияларини бирламчи оммавий жойлаштириш (IPO) учун андеррайтер танлади. Маълумотлар товар-хом ашё биржаси тендер бўлимига жойлаштирилган.
Аризалар 23—29 март кунлари қабул қилинган. Ҳозирда энг яхши таклифни танлаш натижалари бўйича баённома шакллантирилган, бироқ тендер ғолиби ошкор этилмаган.
Андеррайтер акцияларни сотишга ёрдам беради. Уларни баҳолайди, нарх белгилайди ва жойлаштириш ишларида қатнашади.
“Алоқабанк” акциялари Халқ IPO’сига чиқарилиши режалаштирилган 40 та давлат компанияларидан бири ҳисобланади. Режада “Алоқабанк”нинг 23 млн дона акцияларини IPO’га чиқариш бор.
2022 йилда Вазир Маҳкамаси 20 дан ортиқ компанияларнинг IPO ва SPO ўтказиш учун тахминий муддатлари маълум қилинганди. Унга кўра, “Алоқабанк”нинг IPO’си 2023 йилнинг апрель ойида бўлиб ўтиши керак эди.
2023 йилнинг февралида UzAuto Motors IPO ўтказган эди. Савдолар якунига кўра, компаниянинг 56,9 млрд сўмлик акциялари Республика фонд биржасига жойлаштирилган. Уларнинг 80 фоизи компанияларга, 20 фоизи ўзбекистонликлар ҳиссасига тўғри келади.
UzAuto Motors IPO орқали 196-220 млрд сўм жалб қилмоқчи эди, бироқ рақамлар IPO кутилганидек бўлмади.
IPO нима ва у оддий одамларга нима беради?
IPO (Initial Public Offering) — бирламчи оммавий таклиф, акцияларни фонд бозори орқали сотиш жараёни. Бу корхона учун нафақат пул жалб қилиш, балки янги босқичга кўтарилиб, оммавий ва шаффоф бўлиш йўли дир. IPO’дан кейин деярли барча нарса ўзгаради — ҳисобот шаклларидан тортиб ривожланиш режаларигача.
IPO ўтказиш — хусусийлаштириш усулларидан бири. Сўнгги йилларда ҳукумат компанияларни кимошди савдоси ва аризалар қабул қилиш йўли билан сотиш орқали иқтисодиётдаги иштирокини камайтиришга ҳаракат қилмоқда.
Оддий одамлар учун бу йирик компаниянинг маълум бир қисмининг эгаси бўлиш ва фойданинг бир қисмини олиш имкониятидир.
Халқ IPO’сида эса акцияларни фақат Ўзбекистон фуқаролари сотиб олиши мумкин бўлади.
Изоҳ (0)