Ukraina prezidenti Vladimir Zelenskiy 23-iyul kuni Turkiyada Kiyev va Moskva o‘rtasida tinchlik muzokaralarining yangi raundi bo‘lib o‘tishini ma’lum qildi. Bu haqda Anadolu xabar berdi.
Zelenskiy Ukraina Milliy xavfsizlik kengashi kotibi Rustem Umerov bilan muzokaralarga tayyorgarlik ko‘rish va asirlar almashish masalasini muhokama qilgan.
“Umerov uchrashuv chorshanba kuniga rejalashtirilganini ma’lum qildi. Ertaga batafsilroq ma’lumot beramiz”, dedi Zelenskiy videomurojaatda.
Zelenskiy diplomatlardan bo‘lajak muzokaralar xalqaro formatda bo‘lishini so‘ragan. Rossiya tomoni esa Kiyevning taklifiga darhol izoh bermagan. Biroq rus axborot agentligi manbalari muzokaralar 24—25-iyul kunlari bo‘lib o‘tishini xabar qilgan.
“Biz tomonimizdan kun tartibi aniq. Mezbon davlatlarga ushbu muzokaralarning muhimligini yana bir bor eslatib o‘tmoqchiman”, degan Ukraina rahbari X’da.
Shu kunlarda Ukraina rasmiylari Rossiyaga qarshi xalqaro sanksiyalarni kengaytirish, ko‘proq harbiy texnikalarga ega bo‘lib, moliyalashtirishni ko‘paytirish masalalariga ustuvorlik berib kelayotgan edi.
“Daniya modelidan tortib Chexiyaning artilleriya va fransuz texnikalarigacha… Hozir ustuvorlik barcha turdagi dronlarda”, degan prezident.
Istanbulda 16-may va 2-iyun kunlari Rossiya va Ukraina o‘rtasida tinchlik muzokaralarining dastlabki ikki raundi bo‘lib o‘tgandi. Unda har ikki tomon harbiy asirlarni almashishga — birinchi navbatda, eng yosh va eng og‘ir yaradorlarni — va har ikki tomondan 6 ming askarning jasadlarini qaytarishga kelishib olgandi.
Izoh (0)