Qashqadaryo viloyati Taxtaqoracha dovonida yuk mashinasi pastlikka tushib ketishi oqibatida yonib ketdi. Bu haqda viloyat Favqulodda vaziyatlar boshqarmasi axborot xizmati xabar berdi.
Xabarga ko‘ra, holat 14-aprel kuni soat taxminan 09:45 da Kitob tumanidan o‘tuvchi Taxtaqoracha dovoni avtomobil yo‘lining 1139-kilometrida sodir bo‘lgan. Samarqand–Qashqadaryo yo‘nalishi bo‘yicha harakatlanib ketayotgan, Chiroqchi tumanida yashovchi fuqaro O.A o‘zining ehtiyotsizligi oqibatida Isuzu boshqaruvini yo‘qotib, yuk mashinasi pastlikka tushib ketgan.
Oqibatda yong‘in chiqqan va transport vositasi to‘liq yongan. Vaziyat bo‘yicha xabar kelib tushgach, bitta qutqaruv bo‘linma hamda qutqaruvchilar guruhi manzilga yetib borib sodir bo‘lgan yong‘in oqibatlarini bartaraf etgan.
Qayd etilishicha, ushbu yuk mashinasida bo‘lgan 24 yoshli fuqaro O.A hamda unga hamrohlik qilayotgan 2008-yilda tug‘ilgan fuqaro A.O mashinadan sakragan. Sakrash oqibatida ular tan jarohati olgan va tuman tibbiyot birlashmasiga yuborilgan. Hozirda ularning ahvoli yaxshi.
Izoh (0)