Markaziy bank 2023-yilning 3 oyida aholiga ajratilgan ipoteka kreditlari bo‘yicha ma’lumot berdi.
Unga ko‘ra, aholiga ajratilgan ipoteka kreditlari qoldig‘i 2018-yilga qaraganda 5 barobarga ko‘payib, joriy yilda 48,2 trln so‘mga yetgan.
Joriy yilning yanvar—mart oylarida aholiga 3,2 trln so‘mlik ipoteka krediti ajratilgan. O‘tgan yilning mos davrida bu ko‘rsatkich 2,8 trln so‘mni tashkil etgan edi. Demak, o‘sish 500 mlrd so‘mdan ko‘proq.
Biroq joriy yilda o‘tgan yil bilan solishtirilganda 2,9 ming nafarga kamroq odam ipoteka kreditini olgan. Yangi uylar uchun ipoteka krediti ham 5 657 nafar kamroq odamga berilgan. Shunga qaramay, eski uylar uchun ipoteka ajratish ikki barobardan oshiq ko‘paygan.
2022-yilning birinchi choragida ipoteka olgan ayollar va erkaklar ulushi 59 foizga 41 foiz ko‘rinishida bo‘lgan. 2023 yilda esa farq yanada kattalashgan — 63 foizga 37 foiz.
Ipoteka kreditlarining asosiy qismini 31-50 yosh oralig‘idagi fuqarolar olmoqda — 70 foiz.
Toshkent shahri 2022-yilda ajratilayotgan ipoteka kreditlari bo‘yicha qolgan viloyatlarga qaraganda bir necha bor oldinda bormoqda — 1 trln so‘m.
Kreditlarning 66 foizi yangi qurilgan — birlamchi bozordagi uylarga ajratilgan. Yil boshidan beri 15 mingdan ortiq fuqaroga ipoteka kreditlari berilgan.
Yil boshidan beri ipoteka kreditlarini moliyalashtirish manbalari:
- Moliya vazirligi — 1,6 trln so‘m;
- Bank o‘z mablag‘lari — 1,1 trln so‘m;
- Ipotekani qayta moliyalashtirish manbalari — 521,6 mlrd so‘m.
Banklar tomonidan ajratiladigan ipoteka kreditlarining o‘rtacha foiz stavkasi 23,7 foiz bo‘lib turibdi. Yangi tartib doirasida ajratilgan ipoteka kreditlari esa 17,4 foiz.
Avvalroq O‘zbekiston hududlarida ipoteka krediti bo‘yicha vaziyat qandayligi haqida xabar berilgandi.
Izoh (0)