Марказий банк 2023 йилнинг 3 ойида аҳолига ажратилган ипотека кредитлари бўйича маълумот берди.
Унга кўра, аҳолига ажратилган ипотека кредитлари қолдиғи 2018 йилга қараганда 5 баробарга кўпайиб, жорий йилда 48,2 трлн сўмга етган.
Жорий йилнинг январь—март ойларида аҳолига 3,2 трлн сўмлик ипотека кредити ажратилган. Ўтган йилнинг мос даврида бу кўрсаткич 2,8 трлн сўмни ташкил этган эди. Демак, ўсиш 500 млрд сўмдан кўпроқ.
Бироқ жорий йилда ўтган йил билан солиштирилганда 2,9 минг нафарга камроқ одам ипотека кредитини олган. Янги уйлар учун ипотека кредити ҳам 5 657 нафар камроқ одамга берилган. Шунга қарамай, эски уйлар учун ипотека ажратиш икки баробардан ошиқ кўпайган.
2022 йилнинг биринчи чорагида ипотека олган аёллар ва эркаклар улуши 59 фоизга 41 фоиз кўринишида бўлган. 2023 йилда эса фарқ янада катталашган — 63 фоизга 37 фоиз.
Ипотека кредитларининг асосий қисмини 31-50 ёш оралиғидаги фуқаролар олмоқда — 70 фоиз.
Тошкент шаҳри 2022 йилда ажратилаётган ипотека кредитлари бўйича қолган вилоятларга қараганда бир неча бор олдинда бормоқда — 1 трлн сўм.
Кредитларнинг 66 фоизи янги қурилган — бирламчи бозордаги уйларга ажратилган. Йил бошидан бери 15 мингдан ортиқ фуқарога ипотека кредитлари берилган.
Йил бошидан бери ипотека кредитларини молиялаштириш манбалари:
- Молия вазирлиги — 1,6 трлн сўм;
- Банк ўз маблағлари — 1,1 трлн сўм;
- Ипотекани қайта молиялаштириш манбалари — 521,6 млрд сўм.
Банклар томонидан ажратиладиган ипотека кредитларининг ўртача фоиз ставкаси 23,7 фоиз бўлиб турибди. Янги тартиб доирасида ажратилган ипотека кредитлари эса 17,4 фоиз.
Аввалроқ Ўзбекистон ҳудудларида ипотека кредити бўйича вазият қандайлиги ҳақида хабар берилганди.
Изоҳ (0)