Хитойнинг Кобулдаги элчихонаси Афғонистондаги мўтадил ва оқилона бошқарувни қўллаб-қувватлаши ҳақида баёнот берди. Бу ҳақда “Дарё”нинг Афғонистондаги мухбири хабар берди.
Баёнот 12 апрель, чоршанба куни эълон қилинган бўлиб, Хитойнинг Афғонистондаги мавжуд вазият бўйича позициясини тасвирлаган. Хитой Афғонистоннинг мустақиллиги ва суверенитети, диний эътиқодлари ва урф-одатларини ҳурмат қилишини, ҳеч қачон унинг ички ишларига аралашмаслигини билдирган.
Шунингдек, Хитой Афғонистондан “очиқ ва инклюзив тузилмани шакллантиришни, мўтадил ҳамда оқилона ички ва ташқи сиёсатни юритишни, барча давлатлар, айниқса, қўшни давлатлар билан дўстона алмашинувларни кутишини” билдирди.
“Толибон” Афғонистонни эгаллаб олганидан бери бир ярим йилдан кўпроқ вақт ўтмоқда, ҳеч бир давлат бу гуруҳни Афғонистон ҳукумати сифатида расман тан олмаган, гарчи баъзи давлатлар, жумладан, Хитой ҳам “Толибон” элчисини қабул қилган.
Дунёнинг аксарият давлатлари Афғонистоннинг барча этник гуруҳлари ва халқларини ифодаловчи инклюзив ҳукуматни шакллантиришга алоҳида эътибор қаратмоқда. “Толибон” танқидчиларига кўра, ҳозирги ҳукуматни бир миллат ва бир гуруҳ ташкил қилади. Ҳозирда “Толибон” Вазирлар маҳкамаси аъзоларининг аксарияти пуштунлар ва “Толибон” аъзолари бўлиб, ҳеч бир ҳазора ёки шиа йўқ. Мамлакатлар “Толибон”дан инсон ҳуқуқлари, хусусан, аёллар ҳуқуқларини ҳурмат қилишини кутмоқда. Аммо гуруҳ ҳокимиятни қўлга киритгандан буён аёллар ва қизларни таълим ва меҳнатдан маҳрум қилган.
Изоҳ (0)