Birlashgan Millatlar Tashkilotining Afg‘onistondagi Gumanitar masalalarni muvofiqlashtirish boshqarmasi ushbu davlatga insonparvarlik yordami uchun ajratilayotgan mablag‘ tugab borayotgani haqida ogohlantirdi, deb xabar bermoqda “Daryo”ning Afg‘onistondagi muxbiri.
12-aprel, chorshanba kuni OCHA (BMTning Gumanitar masalalarni muvofiqlashtirish boshqarmasi) Twitter’dagi sahifasida Afg‘onistonga insonparvarlik yordamini moliyalashtirish to‘xtatilishi mamlakatdagi millionlab odamlar hayotiga tahdid solayotganini aytdi.
Nashr etilgan maʼlumotlarga ko‘ra, resurslar yetishmasligi sabab Jahon oziq-ovqat tashkiloti Afg‘onistondagi muhtojlarga yordamni ikki baravar qisqartirishi kutilmoqda.
OCHA Afg‘onistondagi insonparvarlik ehtiyojlari uchun yetarli mablag‘ to‘planmasa, millionlab afg‘onlar ocharchilik, kasallik va o‘limga duchor bo‘lishidan ogohlantirdi.
Eslatib o‘tamiz, afg‘onistonliklarning ba’zilari o‘z farzandlariga sedativ (tinchlantiruvchi) dorilar berib, ulardagi ochlik hissini susaytirishga majbur bo‘layotgan bo‘lsa, boshqalari kun kechirish uchun bolalarini yoki o‘z organlarini sotayotgani haqida xabar berilgandi.
Izoh (0)