Toshkent shahrida 12-aprel kuni Sog‘liqni saqlash vazirligi tomonidan “O‘zbekiston sog‘liqni saqlash tizimi transformatsiyasi” mavzusida xalqaro forum o‘tkazildi. Xalqaro anjumanda so‘zga chiqqan vazir tibbiyot tizimiga sarmoyalarni jalb qilish, sheriklikning yangi shakllarini rivojlantirish haqida gapirdi, deb xabar bermoqda “Daryo” muxbiri.
Amrillo Inoyatovning aytishicha, tibbiyotni rivojlantirish uchun eng avval ta’lim tizimiga e’tibor qaratishimiz zarur.
“Mamlakat tibbiy ta’limini o‘zgartirmay, unga fundamental yondoshmay turib, biz tibbiyotimizni o‘zgartira olmaymiz. Shuningdek, tibbiyoti rivojlangan boshqa davlatlar bilan hamkorlik qilmas ekanmiz, yangi bosqichga ko‘tarilolmaymiz. Bizning betakror, katta ‘fishka’miz bor, bu — muhtaram prezidentimizning shifokor oilasida tug‘ilgani. Shu sababli bugun O‘zbekiston tibbiyotiga juda katta e’tibor qaratilyapti”, — dedi vazir.
SSV rahbari O‘zbekistondagi qulay infratuzilma, zarur shart-sharoitlar, investorlarning huquqlari qonun bilan mustahkamlangani ortidan chet ellik hamkorlarning qiziqishi yildan-yilga ortib borayotganini bildirdi.
“Prezident farmonlari natijasida so‘nggi 6 yilda xususiy klinikalar soni 2,5 baravar ko‘payib, 8 mingtaga yetdi. Bu ham, albatta, kam. Bugungi kunda xorijiy investitsiyalar ishtirokidagi 159 ta shifoxona faoliyat olib bormoqda. Bu raqamni yaqin ikki yilda 10 baravarga oshirishni reja qilganmiz”, — deya qayd etdi Amrillo Inoyatov.
Vazirning ta’kidlashicha, xususiy tibbiyot uchun cheklovlar olib tashlanishi natijasida ular shug‘ullanadigan yo‘nalishlar soni 50 tadan 130 taga oshgan.
“Xususan, hozir nodavlat tibbiyotning sohadagi umumiy ulushi 30 foizdan ortgan. Bu ko‘rsatkichni 2025-yilga borib, kamida 60 foizga yetkazish maqsad qilingan. Bundan tashqari, qisqa vaqtda 33 ta xususiy shifoxona tomonidan davlat buyurtmasi asosida 11 milliard so‘mlik tibbiy xizmatlar ko‘rsatilgan. Bu raqamlarni 10 barobarga oshirishni reja qilganmiz”, — dedi u.
Izoh (0)