Jizzaxda pul evaziga tibbiyot kollejini tugatgani to‘g‘risida diplom olib berishni vaʼda qilgan shaxslar qo‘lga olindi, deb xabar beradi Bosh prokuratura huzuridagi departament.
Qayd etilishicha, departament hamda DXXning Jizzax viloyati boshqarmalari tomonidan tezkor tadbir o‘tkazilgan. Tadbirda A.Ya. ismli shaxs fuqarolar G.A. va K.O‘.ga tanishlari orqali tibbiyot kollejini tugatgani to‘g‘risida diplom olib berish evaziga 2,4 ming dollarni olgan vaqtida ushlangan. Uning ko‘rsatuviga asosan davom etgan tadbirda, Kasbiy taʼlimni rivojlantirish va muvofiqlashtirish hududiy boshqarmasi bosh uslubchisi B.A. 2,4 ming dollarni olgan vaqtida ashyoviy dalillar bilan qo‘lga olingan.
Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.
Eslatib o‘tamiz, 2022-yil boshida Jizzax viloyati IIB jinoyat qidiruv boshqarmasi uyushgan jinoyatchilikka qarshi kurashish bo‘limi xodimlari tomonidan soxta diplom yasab sotuvchilar qo‘lga olingandi. Shuningdek, o‘sha yilning sentabrida Sirdaryoda institutni tugatganlik haqida soxta diplom olib bermoqchi bo‘lganlar ushlangani, 2020-yilda esa Asakada soxta diplom va’da qilgan kollej hisobchisi 1100 dollar pora bilan qo‘lga tushgani to‘g‘risida xabar berilgandi.
Izoh (0)