Toshkent shahri Yunusobod tumanidan oqib o‘tuvchi Bo‘zsuv kanali bo‘yida noqonuniy obyekt qurilishi to‘xtatildi. Bu haqda Tabiat resurslari vazirligi axborot xizmati xabar berdi.
O‘rganishlar davomida “Toshkent o‘rdasi” MCHJ tomonidan Bo‘zsuv kanali bo‘yi qirg‘og‘ida to‘qqiz qavatli mehmonxona binosi qurish uchun poytaxt hokimining 2014-yil 14-may kungi qarori qabul qilingani, bugungi kunda esa rejalashtirilgan ushbu binoning besh qavati qurilgani ma’lum bo‘lgan.
Toshkent shahar hokimining 2018-yil 13-iyuldagi “Toshkent shahar hududidan oqib o‘tuvchi kanal va kollektorlarning qirg‘oq bo‘yi mintaqalarini belgilash haqida”gi 1043-sonli qaroriga asosan Bo‘zsuv kanalining qirg‘oq bo‘yi kengligi 15 metrni tashkil etishi belgilangan.
Biroq o‘rganish jarayonida ushbu qurilish binosi Bo‘zsuv kanali qirg‘oq bo‘yidan 10 metr masofada joylashgani, qurilish ishlarini amalga oshirish uchun Toshkent shahar kanallardan foydalanish va ularga tutash hududlarni obodonlashtirish boshqarmasidan ruxsatnoma hamda davlat ekologik ekspertizasining xulosasi olinmagani aniqlangan.
Shu munosabat bilan Toshkent shahar Ekologiya boshqarmasi tomonidan qurilish tashkilotiga qurilish ishlarini to‘xtatish va kamchiliklarni bartaraf etish bo‘yicha ogohlantirish berilgan. Shuningdek, qonun buzilishi yuzasidan to‘plangan hujjatlar tegishli tartibda rasmiylashtirilib, huquqiy baho berish uchun tegishli sudga da’vo arizasi kiritish choralari ko‘rilmoqda.
Qurilish va uy-joy kommunal xo‘jaligi vazirligiga ko‘ra, 023-yilda obyekt takroran joyiga chiqib o‘rganilganda ham qurilish-montaj ishlarini boshlash uchun belgilangan tartibda ro‘yxatdan o‘tmasdan qurilish ishlari olib borilayotgani aniqlangan. MCHJ mansabdor shaxsi nisbatan noqonuniy qurilish ishlarini zudlik bilan to‘xtatish bo‘yicha ogohlantirilgan va qurilish ishlariga mas’ullarga tushuntirish ishlari olib borilgan. Shundan so‘ng obyekt qurilishi to‘xtatilgan.
Izoh (0)