Surxondaryo viloyati prokuraturasi Termiz shahrida bir nafar bola kaltaklangani bilan bog‘liq tarqalgan xabar yuzasidan ma’lumot berdi.
Aniqlanishicha, 6-aprel kuni soat 16:30 larda Termiz shahri “Alpomish” mahallasida joylashgan motamsaro ona haykali yonida voyaga yetmagan X.E. yaxshi ko‘rgan qizini voyaga yetmagan M.J. bilan birga yurganini ko‘rib qolib, jamiyatda yurish-turish qoidalarini qasddan mensimasdan M.J.ni urib tan jarohati yetkazgan.
Respublika Sud tibbiy ekspertiza ilmiy amaliy markazi Surxondaryo viloyat filialining dastlabki maʼlumotnomasiga ko‘ra, M.J.ning burun devorlarini ikki tomonlama sinishi kabi tan jarohati olgan.
Holat yuzasidan 10-aprel kuni Termiz shahar IIB huzuridagi Tergov bo‘limi tomonidan Jinoyat kodeksining 277-moddasi 1-qismi bilan jinoyat ishi qo‘zg‘atilib, dastlabki tergov harakatlari olib borilmoqda.
Jinoyat ishining tergovi Termiz shahar prokuraturasi tomonidan nazoratga olingan.
Bundan avval Toshkentda sevgan qiziga narsa olib berish uchun telefon o‘g‘irlagan yigit ushlangani, Qashqadaryoda sevgan qizining uyiga borgan yigit qizning ukasi tomonidan pichoqlanishi oqibatida vafot etgani hamda Andijonda sevgan qizini rashk qilib, 30 yoshli erkakni o‘ldirgani aytilgan o‘smir 9 yilga qamalgani haqida xabar berilgandi.
Izoh (0)