“Qizimni ancha masofagacha quvlab bordi”, “Yo‘lda ikki ayolga tashlangan”. Chiroqchiliklar qishlog‘iga kirib qolgan ayiq haqida

Telegram’dagi kanallarda Qashqadaryo viloyatining Chiroqchi tumanidagi qishloqlarning biriga ayiq oralagani ko‘ringan videolar tarqaldi. Unda olomon taʼqibidan qochayotgan ayiq dastlab xonadonlarning biriga borgani, so‘ngra hududdagi maktab binosi ichkarisiga kirishga uringani maʼlum bo‘ldi. “Daryo” muxbiri ayiq oralagan qishloqqa borib, yovvoyi hayvon bilan boqliq voqealar tafsilotini o‘rgandi.

Mahalliy aholi vakillarining aytishicha, ayiq Chiroqchi tumanining Samarqand viloyati bilan chegara hududidagi tog‘dan kelib qolgan bo‘lishi mumkin.

“Uyim yaqinida qo‘y boqib o‘tirgandim. Bir mahal odamlarning baqir-chaqir ovozi eshitildi. Odamlar menga ‘qoching ayiq keldi’, deyishdi. Men ham ayiqni ko‘rib qocha boshladim. Odamlar mashinada quvishdi. Hatto mashina bilan urib yuborishdi. Shundan so‘ng u kanaldan o‘tib odamlarning hovlilari orqali jarlik tomon qochib ketdi”, — deydi voqeaga guvoh bo‘lgan Gulnoza Oltiboyeva.

Gulnoza Oltiboyeva “Daryo” muxbiriga voqea haqida gapirib bermoqda.Foto: “Daryo”

Molxonamga kirsa-da, qo‘yimga va molimga ham tegmadi

Shu hududda yashovchi yana bir fuqaro Guljahon Safarovaning aytishicha, ayiq beozor va juda qo‘rquvdaligi ko‘rinib turgan bo‘lgan.

“Hovlida ikki kishi bilan gaplashib o‘tirgandim. Ayiq, ayiq degan ovoz eshitildi. Shundan so‘ng mening yonimga kelgan mashinali yigitlar ayiq qayoqqa ketdi deb so‘radi. Hovli chetida bog‘lanib turgan otim bezovtalanayotgan ekan. Ipini uzmasin deb yoniga borsam, bir guruh odamlar ayiqni quvlayotganini ko‘rdim. Ayiq esa men tomon kela boshladi. Yonimdan o‘tib molxonamizga kirib ketdi. Odamlar esa qo‘liga ilingan narsa bilan quvlab keldi. U yerda bittagina qo‘y bor edi. Ayiq o‘sha yerdan chiqib sigir va buzoqlar turgan joyga o‘tdi. Va biroz turdi. Men esa odamlarga tegmanglar, bu ham bir jonzod, sizlarga ziyon bermaydi deb qayta-qayta baqirdim. Ayiqqa juda rahmim keldi. Odamlar ko‘paygach, ayiq qo‘rqib yana qochib ketdi. Lekin na sigir, na qo‘yimga tashlandi. Ularning yonida jimgina turgandi”, — deydi xonadon egasi Guljahon Safarova.

 Guljahon Safarova.Foto: “Daryo”

Qizimni quvib ketdi

Odamlardan qo‘rqib qochgan ayiq kanal yoqasida yashovchi Halima Ortiqovaning qiziga hamla qilgan.

Halima Ortiqova.Foto: “Daryo”

“Shovqinni eshitib avvaliga janjal deb o‘yladim. Qoching deyishgandan so‘ng nimaligini tasavvurimga sig‘dirolmay hayron bo‘ldim. Ne ko‘z bilan ko‘rsam haqiqiy ayiq yuribdi. Uyimiz yonidagi kanaldan o‘tib, kanal yoqasida turgan qizimni quvlab ketdi. Hammamiz jon holatda qochdik. Qizim ikkalamiz arang qutulib qoldik. Ayiq esa soylikka qarab chopib ketdi”, — deydi Halima Ortiqova.

Malohat Ismoilova.Foto: “Daryo”

“Uy ishlarini qilib yurgandim. Odamlarning ovozidan so‘ng ko‘chaga chiqdim. Maktabimizdagi o‘qituvchilardan biri nimaligini aytmasdan oldiga chiqmanglar tashlanib ketadi dedi. Men quturgan it yoki bo‘ri deb o‘yladim. Odamlar mashina bilan borib chuqurchaga tosh ota boshladi. Shundan so‘ng chuqurlikdan ayiq chiqdi. Men qiziqib tomosha qilishga kanal yoqasiga bordim. Kanaldan o‘tolmaydi deb pastlikka tushib turgan edim, otilib chiqdida men tomon yugurib quvlay boshladi. Juda yaqin keldi, yetib olishiga sal qoldi. Jon holatida qochdim”, — deydi Halima Ortiqovaning qizi Malohat Ismoilova.

Qishloq aholisining qo‘shimcha qilishicha, ayiq qishloq odamlaridan birining, to‘g‘rirog‘i uni mashinada quvlaganlarning uyida yashirincha saqlangan. Va xonadondan qochib chiqqan.

Olomon taʼqibidan qochgan ayiq jarliklardan hosil bo‘lgan g‘orga kirib olgan. Ko‘p o‘tmay tuman IIB boshlig‘i topshirig‘iga ko‘ra, otib tashlangan.