Farg‘ona va Toshkent viloyatlarida jinoyat ishlarini ijobiy hal qilib berishni va’da qilgan shaxslar ushlandi. Bu haqda Iqtisodiy jinoyatlarga qarshi kurashish departamenti xabar bermoqda.
Ta’kidlanishicha, Bosh prokuratura huzuridagi departamentning Farg‘ona viloyati boshqarmasi tomonidan IIB xodimlari bilan hamkorlikda tezkor tadbir o‘tkazilgan. Unda fuqarolar D.Q. va M.J. o‘zaro til biriktirib, fuqaro D.ning ishonchiga kirib, uning tanishi R.ni go‘yoki yuqori lavozimda ishlovchi tanishlari yordamida tergov hibsxonasidan chiqarib, unga nisbatan qo‘zg‘atilgan jinoyat ishini ijobiy hal qilib berishni va’da qilib, evaziga 10 ming dollar olgan vaqtda ashyoviy dalillar bilan ushlangan.
Shu kabi, departamentning Zangiota tumani bo‘limi tomonidan IIB xodimlari bilan hamkorlikda o‘tkazilgan tezkor tadbirda fuqaro B.N. fuqaro S.ning ishonchiga kirib, uning tumandagi tergov hibsxonasida saqlanayotgan otasini 5 ming dollar evaziga tanishlari orqali muddatidan ilgari jazodan ozod qilib berishni va’da qilib, oldindan 35 million so‘mni olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)