“Madaniyat va ma’rifat” direktori kanal yo‘nalishi o‘zgartirilishi to‘g‘risidagi loyihaga munosabat bildirdi

“Madaniyat va ma’rifat” telekanali negizida “Karvon” kanalini tashkil etish to‘g‘risidagi qaror loyihasi e’lon qilingandi. Kanal direktori Vohid Luqmonov holat yuzasidan munosabat bildirdi.

Ma’lum bo‘lishicha, rahbariyat telekanal faoliyatini rivojlantirish uchun bir qancha takliflar ishlab chiqqan. Ammo “project.gov.uz” portalida e’lon qilingan loyihada bu takliflar kiritilmagan.

“Avvalo, ‘Madaniyat va ma’rifat’ telekanali faoliyatiga oid hujjat loyihasi ishlab chiqilayotganidan xabarimiz bor edi. Telekanal faoliyatini har tomonlama (g‘oyaviy-badiiy, moliyaviy-iqtisodiy, texnik-texnologik jihatdan) rivojlantirish, telekanalni yanada ko‘rimli qilish bo‘yicha o‘zimizning aniq takliflarimizni bergan edik. Afsuski, jamoatchilik muhokamasi uchun e’lon qilingan hujjat loyihasida bizning takliflarimiz inobatga olinmagan.

Bu hujjat hali loyiha. Ishonamizki, bu loyiha qizg‘in muhokama jarayonidan o‘tib, hammaning fikr-mulohazalari, taklif va g‘oyalari inobatga olingan holda, keng jamoatchilik kutayotgan qarorga aylanadi. O‘z navbatida, milliy o‘zligimiz, ma’naviyatimiz va madaniyatimizga, o‘zbek ziyolilari, san’at va madaniyat fidoyilarining minbari bo‘lgan ‘Madaniyat va ma’rifat’ telekanali taqdiriga befarq bo‘lmasdan o‘zining konstruktiv munosabatlarini bildirayotgan barchaga minnatdorlik bildiramiz”, — deb yozadi telekanal direktori Vohid Luqmonov.

Shuningdek, Qonunchilik palatasi spikeri o‘rinbosari Odiljon Tojiyev ham holat yuzasidan munosabat bildirdi. “Qisqa qilib aytganda, xalqimizga ‘Madaniyat va ma’rifat’ telekanali kerak. Bu boradagi qaror loyihasi keng jamoatchilik, ziyolilar tomonidan tanqidga uchradi. Men ham bir ziyoli, o‘zbek xalqining oddiy bir vakili sifatida ruhoniyatimizni to‘yintirib turgan telekanalning yopilishiga qat’iyan qarshiman. Eng chatoq tomoni, har bir vazirlikka bitta telekanal, degan tamoyilni o‘ylab topmanglar, baraka topgurlar”, — deb yozadi deputat.