Ҳозирги вақтда кўплаб мамлакатлар шифокорларнинг ҳамда ногиронлар учун парвариш ходимларининг жиддий етишмовчилигига дуч келмоқда. 2030 йилга бориб дунёда ушбу касблар бўйича 10 миллион мутахассис етишмаслиги мумкин, деди Жаҳон соғлиқни сақлаш ташкилоти (ЖССТ) бош директори Тедрос Адханом Гебреесус Женевада бўлиб ўтган брифингда.
“Тиббиёт ходимлари ҳар қандай соғлиқни сақлаш тизимининг асосидир”, — деб эслатди у ва кўплаб мамлакатлар тиббий ходимларнинг кескин танқислигини бошдан кечираётгани, уларнинг кўпчилиги яхши маош ва шароит излаб бошқа давлатларга кетиб қолаётганини айтди. ЖССТ ҳисоб-китобларига кўра, “агар ҳозирги тенденция давом этса, дунё 2030 йилга бориб 10 миллион тиббиёт ва парвариш ходимларининг етишмаслигига дуч келади, энг қашшоқ мамлакатларда энг оғир танқислик кузатилади”.
Гебреесус таъкидлаганидек, COVID-19 пандемияси “дунёга соғлиқни сақлаш ва парвариш ходимларининг қанчалик зарурлигини эслатди”. Пандемиядан олдин ҳам бу мутахассисларнинг аксарияти “хавфсиз бўлмаган шароитларда, кам маош ва тегишли тайёргарликдан ўтмаган ҳолда” ишлаган.
ЖССТ ҳисоб-китобларига кўра, пандемия даврида ушбу сектордаги ишчиларнинг ярми “эмоционал зўриқиш”ни бошдан кечирган. ЖССТ раҳбари, шунингдек, дунёда тиббиёт ходимларининг қарийб 70 фоизини аёллар ташкил этса-да, улар соғлиқни сақлаш соҳасидаги юқори лавозимларнинг чорак қисмидан камроғида ишлашига эътибор қаратди.
ЖССТ барча мамлакатларни хавфсиз меҳнат шароитлари, муносиб иш ҳақи билан таъминлаш, меҳнат ҳуқуқларини ҳимоя қилиш, зўравонлик ва камситишлардан ҳимоя қилиш орқали “соғлиқни сақлаш ва парваришлаш ходимларини ҳимоя қилиш ва уларга сармоя киритишга” чақирди.
Изоҳ (0)