O‘zbekistonda mart oyida 76,3 mlrd so‘mlik gazdan noqonuniy foydalanilgani aniqlandi

O‘zbekistonda mart oyida ulgurji isteʼmolchilar tomonidan 76,3 milliard so‘mlik tabiiy gazdan noqonuniy foydalanish holatlari aniqlandi. Bu haqda Energetika vazirligi axborot xizmati xabar berdi.

Xabarga ko‘ra, Energetika vazirligi huzuridagi “O‘zenergoinspeksiya” va huquqni muhofaza qiluvchi organlar hamda gaz taʼminoti korxonalari bilan hamkorlikda o‘tkazilgan nazorat tadbirlari davomida mart oyida 559 ta holatda ulgurji isteʼmolchilar tomonidan 79 million kub metr (76,3 milliard so‘m) hajmdagi tabiiy gazdan noqonuniy foydalanish holatlari aniqlandi.

Gazdan noqonuniy foydalanish holatlari asosan:

• Buxoro viloyatida 24,3 million kub metrni (24,2 milliard so‘m);
• Farg‘ona viloyatida 19,3 million kub metrni (19,3 milliard so‘m);
• Jizzax viloyatida 9,9 million kub metrni (10 milliard so‘m);
• Samarqand viloyatida 10,1 million kub metrni (8,5 milliard so‘m);
• Toshkent shahrida 7,1 million kub metrni (7,1 milliard so‘m) tashkil etgan.

Noqonuniy foydalanish holatlari isteʼmolchilar toifasi bo‘yicha:

• AGTKSHlarda 22 ta holatda (41,7 milliard so‘m);
• issiqxonalarda 17 ta holatda (1,1 milliard so‘m);
• boshqa ishlab chiqarish korxonalarida (asfalt, ohak, gips, chinni mahsulotlari, non mahsulotlari) 90 ta holatda (24,9 milliard so‘m);
• umumiy ovqatlanish shoxobchalarida 54 ta (1 milliard so‘m) holatlar aniqlangan.

Aniqlangan holatlar yuzasidan rasmiylashtirilgan hujjatlar belgilangan tartibda huquqni muhofaza qiluvchi organlarga yuborilgan.