O‘zbekiston Tailand bilan odam savdosi va noqonuniy migratsiyaga qarshi kurash bo‘yicha hamkorlik qilishi va bu bo‘yicha bitim imzolanishi kutilmoqda.
Xabarga ko‘ra, O‘zbekistonning Bangkok shahridagi Bosh konsulligi tomonidan Ichki ishlar vazirligi va Tailand Qirollik politsiyasi hamda odam savdosi uchun masʼul tashkilot — Ijtimoiy rivojlanish va inson xavfsizligi vazirligi vakillari ishtirokida onlayn muloqot tashkil etildi. Unda dastlab vazirliklar faoliyatiga doir o‘zaro maʼlumot almashildi.
Shuningdek, tomonlar o‘rtasida hamkorlikni mustahkamlash maqsadida huquqiy asos yaratish masalasi atroflicha muhokama qilindi. Bu borada “Odam savdosi va noqonuniy migratsiyaga qarshi kurash bo‘yicha hamkorlik to‘g‘risida” O‘zbekiston va Tailand hukumatlararo bitimi loyihasini ishlab chiqishni jadallashtirish, shuningdek, tomonlar uchun dolzarb bo‘lgan boshqa yo‘nalishlar bo‘yicha o‘zaro anglashuv memorandumlarini ishlab chiqishga kelishib olindi.
Bundan tashqari, o‘n millionlab xorijiy sayyohlarni qabul qiladigan mamlakat sifatida Tailandning sayyohlar xavfsizligini taʼminlash bo‘yicha tajribasini o‘rganish maqsadida O‘zbekiston Ichki ishlar vazirligi delegatsiyasining Tailandga safarini tashkil etishga kelishildi. Bu yo‘nalishda Tailand Qirollik politsiyasi o‘z mamlakati sayyohlik politsiyasi ishtirokida O‘zbekiston tomoni uchun malaka oshirish kurslarini uyushtirishga tayyor ekanini bildirdi.
Izoh (0)