Ўзбекистонда март ойида 76,3 млрд сўмлик газдан ноқонуний фойдаланилгани аниқланди 

Ўзбекистонда март ойида улгуржи истеъмолчилар томонидан 76,3 миллиард сўмлик табиий газдан ноқонуний фойдаланиш ҳолатлари аниқланди. Бу ҳақда Энергетика вазирлиги ахборот хизмати хабар берди.

Хабарга кўра, Энергетика вазирлиги ҳузуридаги “Ўзэнергоинспекция” ва ҳуқуқни муҳофаза қилувчи органлар ҳамда газ таъминоти корхоналари билан ҳамкорликда ўтказилган назорат тадбирлари давомида март ойида 559 та ҳолатда улгуржи истеъмолчилар томонидан 79 миллион куб метр (76,3 миллиард сўм) ҳажмдаги табиий газдан ноқонуний фойдаланиш ҳолатлари аниқланди.

Газдан ноқонуний фойдаланиш ҳолатлари асосан:

• Бухоро вилоятида 24,3 миллион куб метрни (24,2 миллиард сўм);
• Фарғона вилоятида 19,3 миллион куб метрни (19,3 миллиард сўм);
• Жиззах вилоятида 9,9 миллион куб метрни (10 миллиард сўм);
• Самарқанд вилоятида 10,1 миллион куб метрни (8,5 миллиард сўм);
• Тошкент шаҳрида 7,1 миллион куб метрни (7,1 миллиард сўм) ташкил этган.

Ноқонуний фойдаланиш ҳолатлари истеъмолчилар тоифаси бўйича:

• АГТКШларда 22 та ҳолатда (41,7 миллиард сўм);
• иссиқхоналарда 17 та ҳолатда (1,1 миллиард сўм);
• бошқа ишлаб чиқариш корхоналарида (асфалт, оҳак, гипс, чинни маҳсулотлари, нон маҳсулотлари) 90 та ҳолатда (24,9 миллиард сўм);
• умумий овқатланиш шохобчаларида 54 та (1 миллиард сўм) ҳолатлар аниқланган.

Аниқланган ҳолатлар юзасидан расмийлаштирилган ҳужжатлар белгиланган тартибда ҳуқуқни муҳофаза қилувчи органларга юборилган.