Rossiyaning Saratov viloyatida ichida O‘zbekiston fuqarolari bo‘lgan avtomobil yo‘l-transport hodisasiga uchradi. Bu haqda viloyat sog‘liqni saqlash vaziri Oleg Kostin o‘zining Telegram kanalida ma’lum qildi.
Ma’lumotlarga ko‘ra, YTH 2-aprel kuni ertalab R-208 avtomobil yo‘lining 145-kilometrida sodir bo‘lgan. 2000-yilda tug‘ilgan yigit Toyota Vellfire rusumli avtomashina boshqaruvini yo‘qotgan va transport vositasi ag‘darilib ketgan. Kostinning ta’kidlashicha, “Malinovka” aholi punktidan o‘tgan trassada yengil avtomobil yo‘l chetidagi ariqqa uchib ketishi oqibatida olti kishi jabrlangan, ularning to‘rt nafari shifoxonaga olib borilgan. Yo‘lovchilarning ikki nafarining ahvoli og‘ir, yana ikki nafariniki o‘rta darajada og‘ir ekani aytilmoqda.
“Jabrlanganlar orasida 40 yoshli ayol bor, unda bosh miya jarohati, ko‘krak qafasi va o‘ng tizza bo‘g‘imlarining yopiq jarohati qayd etilgan. Shuningdek, 26 yoshli erkak bosh miya jarohati, ko‘krak qafasining yopiq jarohati, umurtqa pog‘onasi sinishi, 38 yoshli erkak bosh miya jarohati, ko‘krak qafasining yopiq jarohati, bel umurtqasining sinishi tashxisi bilan olib kelingan”, — deb yozadi vazir.
Uning aytishicha, jabrlangan besh kishidan uch nafari Rtishchevskaya tuman kasalxonasida qolmoqda, ikki nafari — 20 va 39 yoshli erkak qoniqarli holatda ambulator davolanishga chiqarilgan.
Izoh (0)