Россиянинг Саратов вилоятида ичида Ўзбекистон фуқаролари бўлган автомобиль йўл-транспорт ҳодисасига учради. Бу ҳақда вилоят соғлиқни сақлаш вазири Олег Костин ўзининг Telegram каналида маълум қилди.
Маълумотларга кўра, ЙТҲ 2 апрель куни эрталаб Р-208 автомобиль йўлининг 145-километрида содир бўлган. 2000 йилда туғилган йигит Toyota Vellfire русумли автомашина бошқарувини йўқотган ва транспорт воситаси ағдарилиб кетган. Костиннинг таъкидлашича, “Малиновка” аҳоли пунктидан ўтган трассада енгил автомобиль йўл четидаги ариққа учиб кетиши оқибатида олти киши жабрланган, уларнинг тўрт нафари шифохонага олиб борилган. Йўловчиларнинг икки нафарининг аҳволи оғир, яна икки нафариники ўрта даражада оғир экани айтилмоқда.
“Жабрланганлар орасида 40 ёшли аёл бор, унда бош мия жароҳати, кўкрак қафаси ва ўнг тизза бўғимларининг ёпиқ жароҳати қайд этилган. Шунингдек, 26 ёшли эркак бош мия жароҳати, кўкрак қафасининг ёпиқ жароҳати, умуртқа поғонаси синиши, 38 ёшли эркак бош мия жароҳати, кўкрак қафасининг ёпиқ жароҳати, бел умуртқасининг синиши ташхиси билан олиб келинган”, — деб ёзади вазир.
Унинг айтишича, жабрланган беш кишидан уч нафари Ртишчевская туман касалхонасида қолмоқда, икки нафари — 20 ва 39 ёшли эркак қониқарли ҳолатда амбулатор даволанишга чиқарилган.
Изоҳ (0)