Qarshida qurilish bo‘layotgan bino oldidagi 35 tup manzarali daraxt kesib tashlandi

O‘zbekiston Ekologik partiyasi Qashqadaryo viloyat kengashi Qarshi shahrida noqonuniy kesib tashlangan manzarali daraxtlar bo‘yicha ma’lumot berdi.

Ijtimoiy tarmoqlarda Qarshi shahar “Tabassum” mahallasida yashovchi fuqarolardan tungi payt noma’lum shaxslar tomonidan 35 tup manzarali daraxtlarning ayovsiz kesib tashlagani tasvirlangan suratlar tarqaldi.

“Aytishlaricha, barg chiqarib, hattoki meva tugishga (tut) ulgurgan daraxtlar quruvchilarga yoqmagan”, — deyiladi xabarda.

Ekologik partiyaning viloyat kengashiga bu bo‘yicha murojaat kelib tushgan va ushbu murojaatni kengashi raisi Shokir Imenov joyiga borib o‘rgangan. Aniqlanishicha, “Tabassum” mahallasi hududidagi tugallanmagan qurilish binosi oldida 35 tup jumladan – mojevennik, majnuntol, tut, qayrag‘och, Eldor qarag‘ayi va boshqa manzarali daraxtlar kesib tashlangan.

Hozirda ushbu holat yuzasidan shahar Ichki ishlar boshqarmasi, Tabiat resurslari vazirligi viloyat boshqarmasi mas’ullari, Ekologik partiya vakillari, mahalla faollari, jurnalist va blogerlar, boshqa mutasaddi tashkilotlar tomonidan o‘rganish ishlari olib borilmoqda.

Oldinroq O‘zbekistonda 2022-yil davomida daraxt va butalarning noqonuniy kesilishi ortidan tabiatga 10 milliard so‘m zarar yetkazilgani aytilgandi.