Buxoroda ichki ishlar profilaktik inspektoriga faol qarshilik qilib, unga jismoniy kuch ishlatgan qorako‘llik shaxs sud hukmi bilan bir yilga qamaldi. Bu haqda Jinoyat ishlari bo‘yicha Qorako‘l tuman sudiga tayanib, “Xabar.uz” xabar berdi.
Sud hujjatlariga ko‘ra, Qorako‘l tumanining “Mirzaqalʼa” mahallasida yashovchi 33 yoshli O.D. yakka tartibdagi mehnat faoliyati bilan shug‘ullanib kelgan. 2013-yilda qo‘shni mahalladan uylangan. Ular uch nafar farzand ko‘rishgach, o‘zaro kelishmovchilik sababli 2022-yilda ajralgan. Farzandlari uchun aliment to‘lab kelayotgan O.D. shaxsiy kelishmovchilik sababli sobiq ayoli va uning onasi bilan o‘zaro janjallashgan va huquqbuzarlik sodir etgan.
Holat yuzasidan profilaktika inspektori tomonidan maʼmuriy bayonnoma rasmiylashtirilib, sudga oshirilgan. O.D.ning xatti-harakatlari Jinoyat ishlari bo‘yicha Qorako‘l tuman sudi tomonidan ko‘rib chiqilib, sud hukmiga ko‘ra, unga nisbatan Ma’muriy javobgarlik to‘g‘risidagi kodeksning 183-moddasi (mayda bezorilik) qo‘llanilib, yetti sutka maʼmuriy qamoq jazosi tayinlangan.
Sud hukmi o‘qib eshittirilgach, aybdor hukmdan norozi bo‘lib, sud zalida baqir-chaqir qilganida, masʼullar undan tinchlanishni so‘ragan. Biroq u o‘z xatti-harakatida davom etib, qo‘liga kishan solmoqchi bo‘lgan Qorako‘l tuman IIB profilaktik inspektori Sherali Norqulovga nisbatan kuch ishlatgan. Inspektorning yuz sohasiga boshi bilan bir marotaba zarb bilan urib, unga tan jarohati yetkazgan.
Bu holat O.D.ga nisbatan qo‘llaniladigan jazo chorasining kuchaytirilishiga sabab bo‘lgan.
“Maʼmuriy jazo olgan fuqaroga keyingi sud hukmi bilan jinoiy jazo qo‘llanildi. Jinoyat kodeksi 219-moddasining 1-qismida nazarda tutilgan jinoyatni sodir qilganlikda aybli deb topilib, unga bir yil muddatga ozodlikdan mahrum qilish jazosi qo‘llanildi. Aybdor sud zalida qamoqqa olinib, jazoni manzil-koloniyalarda o‘tashi belgilandi”, — deydi sud raisi Jalol Sadirov.
Izoh (0)