“Дарё” интернет нашрида автомобиль харид қилиш учун “Ўзавтосаноат” ҳисоб рақамига машинанинг юз фоиз тўловини амалга ошириб, ҳамон автомобилини ололмаётган қашқадарёлик харидор ҳақида ҳикоя қилинганди. Мурожаатчининг таҳририятга такрорий мурожаат қилишига кўра, муаммо ҳамон ечимини топмаган.
“Мен банк орқали ‘Ўзавтосаноат’га Gentra автомобили учун юз фоиз тўловни амалга ошириб, айтилган муддат ўца-да, ҳали ҳам автомобилимни ололмай юрган харидорман. Бу ҳақда мурожаат қилмаган жойим қолмади”, — дейди харидор Бекзод Фармонов.
Мурожаатчининг айтишича, муаммо “Дарё” нашрида оммага ошкор этилгач, мижоз пулини қабул қилиб олиб, ўз вақтида кўрсатилган манзилга ўтказмаган банк филиали раҳбари Алишер Мирзаев унинг хонадонига бориб, ёрдам беришини айтган.
“Мақола чиққач, банк раҳбари уйимга келиб, мурожаат қилишни тўхтатишимни, муаммони ҳал қилиб беришини айтди. Аммо яна алдади”, — дейди Бекзод Фармонов.
Аниқланишича, харидор 2022 йилнинг июль ойида "Aloqabank"нинг Қашқадарё вилояти филиали орқали Gentra автомобили учун тўловни амалга оширган.
“Банк орқали биринчи пластик карточкамдан 65 миллион, иккинчисидан эса 12 миллион сўм пул тўладим. Банк ходими тўловлар бўлгани ҳақидаги маълумотномаларни қўлимга тутқазиб, пул сўралган жойга ўтказилганини айтди. Хурсанд бўлиб уйга қайтдим. Орадан уч ой ўтгач, автосалонга бориб, машинам қачон чиқишини, қолган 50 фоиз тўловларни қачон тўлашим кераклиги ҳақида маълумот олмоқчи бўлдим. Автосалон ходимлари эса уларга ҳисобимдан ҳеч қандай пул тушмаганини, шартноманинг 7 кунлик муддати ўтиб кетгани боис шартнома бекор бўлганини айтишди. Банкка келиб, вазиятга ойдинлик кирицам, банк ходимининг айби билан мен ўз вақтида тўлаган пулим автосалон ҳисоб рақамига тушмай, банкда қолиб кетган”, — дейди мурожаатчи.
Бекзод Фармоновнинг айтишича, 2022 йилнинг декабрь ойида банк раҳбари ва автосалон масъули уни чақириб, “машинангиз заводдан чиқиб, автосалонга келди, мана бу машина сизники”, деб унга янги машина кўрсатган. Аммо кўп ўтмай бу ёлғон бўлиб чиққан.
“Мени чақириб, мана бу янги машина сизники, арзимас муаммоси қолди дейишгач, мен автомобиль тўловининг қолган қисмини ҳам тўладим. Лекин 2022 йилнинг декабрь ойи у ёқда турсин, 2023 йилнинг февраль ойида ҳам машинадан дарак йўқ. Банк раҳбарига нега мени алдадингиз десам, автосалон бошлиғига ишонгандим, у ҳам бизни алдади деяпти. Автосалон бошлиғи эса бу ҳақда гап бўлмаган деяпти. Хуллас, автомобиль пулини тўлиқ тўлаб қўйган бўлсам-да, ололмай сарсонман”, — дейди янги машина минишга иштиёқманд фермер.
“Дарё” мазкур ҳолат юзасидан “Aloqabank”нинг Қашқадарё вилояти филали масъули Алишер Мирзаев билан икки маротаба — 2022 йилнинг сентябрь, 2023 йилнинг февраль ойларида мулоқот қилганди. Дастлабки мулоқотда масъул ҳақиқатан ҳам банк ходимларининг хатоси сабаб муаммо юзага келганини, бироқ мижоз билан келишганини ва айтилган муддатда муаммони ечиши ҳақида маълум қилганди. 2023 йилнинг февраль ойидаги такрорий мулоқотда эса муаммони ҳал этиш кечикканини, буни ОАВда ёритиб жамоатчиликни бундан бохабар қилиш керакмаслигини айтди. Шунингдек, у фермерга берган ваъдасини 2023 йилнинг 28 февраль куни бажаришини маълум қилганди. Аммо банк раҳбари яна ваъдасининг устидан чиқмаган.
Харидорнинг “Дарё”га такрорий мурожаатида айтилишича, банк раҳбарияти мазкур муаммони банк филиали раҳбарини жазолаш билан ечишга уринган.
“Банк раҳбарияти муаммони ечишни ходимини жазолаш деб билдик шекилли, менинг муаммойимга эътибор қаратилмади. Шу сабаб 2023 йилнинг 25 февраль куни вилоят прокуратурасига мурожаат қилдим. Ва қўлимдаги барча ҳужжатларни тақдим қилдим. Вилоят прокуратураси ҳам ишимни ўрганишни пайсалга солавергач, қайта-қайта мурожаат қилиб бордим. Учинчи марта борганимда, ишим шаҳар прокуратурасига ўтганини айтишди. Шаҳар прокуратурасига борсам, ишингиз вилоят прокуратурасидан бизга келмаган дейишди. Кейин вилоятдан код беришгач, ҳа бизда экан, тергов қилинаётган экан дейишди. Жамшид Абдуллаевич деган ходим ўрганаётган экан. Лекин айни кунгача ҳам ҳеч қандай натижа йўқ, прокуратура ҳам сарсон қилмоқда”, — дейди у.
Мурожаатчи харидор 2023 йил инсон қадри юксалаётган пайтда банк раҳбари унинг шаъни ва қадр-қимматини камситганини айтмоқда.
“Инсон қадри йилида банк раҳбари мижознинг устидан кулиб, шу даражада ўйин қилишга ҳаққи борми? Бунга ким ҳуқуқ берди?”, — дейди алданганини айтган харидор.
“Дарё” воқеалар ривожини кузатишда давом этади.
Изоҳ (0)